പത്തനംതിട്ട: ശബരിമലയില് ചിത്തിര ആട്ടവിശേഷദിവസം അന്പത്തിരണ്ടുകാരിയായ തീര്ഥാടകയെ ആക്രമിച്ചുവെന്ന കേസില് ബിജെപി സംസ്ഥാന ജനറല് സെക്രട്ടറി കെ. സുരേന്ദ്രന്റെ ജാമ്യാപേക്ഷ തള്ളി. പത്തനംതിട്ട പ്രിന്സിപ്പല് സെഷന്സ് കോടതിയാണ് ജാമ്യാപേക്ഷ തള്ളിയത്. നേരത്തെ റാന്നി ജുഡീഷല് ഒന്നാംക്ലാസ് മജിസ്ട്രേറ്റ് കോടതിയും സുരേന്ദ്രന്റെ ജാമ്യപേക്ഷ തള്ളിയിരുന്നു. കേസിലെ ഒന്നാം പ്രതി ഇലന്തൂര് സ്വദേശി സൂരജിന്റെ ജാമ്യാപേക്ഷയും പത്തനംതിട്ട പ്രിന്സിപ്പല് സെഷന്സ് കോടതി തള്ളി. സൂരജിന്റെ ഫേസ്ബുക്ക് പോസ്റ്റാണ് സുരേന്ദ്രന് ഗൂഢാലോചന നടത്തിയതിന് തെളിവായി പോലീസ് ഹാജരാക്കിയിട്ടുള്ളത്. അതേസമയം സുരേന്ദ്രന് രണ്ട് കേസുകളില്ക്കൂടി ജാമ്യം ലഭിച്ചു. കോഴിക്കോട്ട് രജിസ്റ്റര് ചെയ്ത കേസുകളിലാണ് ജാമ്യം ലഭിച്ചിരിക്കുന്നത്. നവംബര് 17നു ശബരിമല സന്നിധാനത്തേക്കുള്ള യാത്രയ്ക്കിടെ സുരേന്ദ്രനെ നിലയ്ക്കലില് നിന്നാണ് പോലീസ് അറസ്റ്റു ചെയ്തത്. തീര്ഥാടകയെ ആക്രമിച്ച കേസില് വധശ്രമം, ഗൂഢാലോചന തുടങ്ങിയ കുറ്റങ്ങളാണ് സുരേന്ദ്രനെതിരെ ചുമത്തിയിരിക്കുന്നത്.
ബിജെപി സംസ്ഥാന ജനറല് സെക്രട്ടറി കെ സുരേന്ദ്രന് ജാമ്യം നിഷേധിച്ചതിനെതിരെ ഹൈക്കോടതിയെ സമീപിക്കാന് ബിജെപി ഒരുങ്ങുന്നു. സംസ്ഥാന അദ്ധ്യക്ഷന് പിഎസ് ശ്രീധരന് പിള്ളയാണ് വ്യക്തമാക്കിയത്. സിപിഎം സമ്മര്ദ്ദത്തിന് വഴങ്ങി പോലീസ് കൃത്രിമ തെളിവുകള് ഉണ്ടാക്കുകയാണെന്നും കെ.സുരേന്ദ്രനെതിരെ എടുത്ത കള്ള കേസുകള് സര്ക്കാര് പിന്വലിക്കണമെന്നും അദ്ദേഹം പറഞ്ഞു.
കെ.സുരേന്ദ്രനെ കള്ളക്കേസുകളില് കുടുക്കി ദ്രോഹിക്കുകയും ജാമ്യം ലഭിക്കാതിരിക്കാന് കൃത്രിമ തെളിവുകള് സി.പി.എം. നേതൃത്വം സൃഷ്ടിക്കുകയുമാണ് ഇപ്പോള് ചെയ്യുന്നത്. പത്തനംതിട്ട സെഷന്സ് കോടതി ജാമ്യം നിഷേധിച്ച കേസില് കെ.സുരേന്ദ്രന് തികച്ചും നിരപരാധിയാണ്. സി.പി.എം. സമ്മര്ദ്ദത്തിന് വഴങ്ങി പോലീസ് കൃത്രിമ തെളിവുകള് ഉണ്ടാക്കുകയാണ്.
ഈ സാഹചര്യത്തില് ജാമ്യാപേക്ഷ നിരസിച്ചതിനെതിരെ ഹൈക്കോടതിയെ സമീപിക്കാന് തീരുമാനിച്ചിരിക്കുന്നു. കെ.സുരേന്ദ്രനെതിരെ എടുത്ത കള്ള കേസുകള് സര്ക്കാര് പിന്വലിക്കണമെന്ന് ബിജെപി ആവശ്യപ്പെടുന്നുവെന്നും ശ്രീധരന് പിള്ള പ്രസ്താവനയില് അറിയിച്ചു.
Discussion about this post