തിരുവനന്തപുരം: ഭിന്നശേഷിക്കാരുടെ നൈപുണ്യ വികസനം ലക്ഷ്യമിട്ട് ഡിഫറന്റ്ലി ആര്ട്സ് സെന്റര് സ്ഥാപിക്കുമെന്ന് ആരോഗ്യ സാമൂഹ്യനീതി മന്ത്രി കെ. കെ. ശൈലജ പറഞ്ഞു. ഇതിലൂടെ കലാ കായിക മേഖലയില് ഭിന്നശേഷിക്കാരായവരെ വളര്ത്തുകയാണ് ലക്ഷ്യം. ഭിന്നശേഷി വിഭാഗങ്ങളിലെ പ്രതിഭകളെ കണ്ടെത്തി പ്രോത്സാഹിപ്പിച്ച് മുന്നോട്ടു കൊണ്ടുവരണമെന്ന് മന്ത്രി പറഞ്ഞു. ഭിന്നശേഷിക്കാര്ക്കുള്ള സംസ്ഥാന അവാര്ഡ് വിതരണവും പ്രളയത്തില്പെട്ട് ഉപജീവനം നഷ്ടമായ ഭിന്നശേഷിക്കാര്ക്കുള്ള ധനസഹായ വിതരണവും വിവിധ പദ്ധതികളുടെ കൈപ്പുസ്തക പ്രകാശനവും നിര്വഹിക്കുകയായിരുന്നു മന്ത്രി.
ഭിന്നശേഷിക്കാര്ക്കുള്ള വിവിധ സംരംഭങ്ങള് പ്രോത്സാഹിപ്പിക്കുന്നതുള്പ്പെടെയുള്ള പദ്ധതി സംബന്ധിച്ച് ചര്ച്ചകള് നടക്കുന്നുണ്ട്. ഭിന്നശേഷിക്കാര്ക്കായി ചിഹ്നഭാഷ ഉപയോഗിച്ച് നൃത്തം ചിട്ടപ്പെടുത്തി അവതരിപ്പിക്കാനുള്ള സന്നദ്ധത നര്ത്തകി മേതില് ദേവിക അറിയിച്ചിട്ടുണ്ട്. ഈ സര്ക്കാരിന്റെ കാലയളവില് തന്നെ എല്ലാ സര്ക്കാര് ഓഫീസുകളും പൊതുകെട്ടിടങ്ങളും അംഗപരിമിത സൗഹൃദമാക്കും. ഭിന്നശേഷി അവാര്ഡ് മുഴുവന് ഭിന്നശേഷി വിഭാഗങ്ങളെയും ഉള്പ്പെടുത്തി പുന:ക്രമീകരിക്കും. കേന്ദ്ര ഭിന്നശേഷി അവാര്ഡ് വിഭാഗങ്ങളുമായി താരതമ്യ പഠനം നടത്തി, സംസ്ഥാന ഭിന്നശേഷി അവാര്ഡ് പദ്ധതി മാനദണ്ഡങ്ങള് പുതുക്കും. അവാര്ഡ് വിഭാഗങ്ങളില് ജില്ലാ ഭരണകൂടങ്ങള്, ത്രിതല പഞ്ചായത്തുകള്, മികച്ച സ്വയം തൊഴില് സംരംഭകരായ ഭിന്നശേഷിക്കാര് തുടങ്ങി കൂടുതല് വിഭാഗങ്ങളേയും വ്യക്തിഗത വിഭാഗങ്ങളേയും ഉള്പ്പെടുത്തുമെന്ന് മന്ത്രി പറഞ്ഞു.
ജില്ല പഞ്ചായത്ത് പ്രസിഡന്റ് വി.കെ. മധു അധ്യക്ഷത വഹിച്ചു. സാമൂഹ്യനീതി വകുപ്പ് ഡയറക്ടര് ജാഫര് മാലിക്, ഭിന്നശേഷി വിഭാഗ കമ്മീഷണര് ഡോ. ഹരികുമാര്, ആസൂത്രണ ബോര്ഡ് അംഗം ഡോ. മൃദുല് ഈപ്പന്, വികലാംഗക്ഷേമ കോര്പറേഷന് ചെയര്മാന് പരശുവയ്ക്കല് മോഹനന്, കെ. എസ്. എസ്. എം എക്സിക്യൂട്ടീവ് ഡയറക്ടര് ഡോ. മുഹമ്മദ് അഷീല് എന്നിവര് പങ്കെടുത്തു.
ജ്യോതിര്ഗമയ സ്ഥാപകയും 2017ലെ കേന്ദ്ര സര്ക്കാരിന്റെ റോള് മോഡല് അവാര്ഡ് ജേതാവുമായ ടിഫാനി ബ്രാറിന്റെ മുഖാമുഖം, ദിവ്യാമൃതം സംഗീത സായാഹ്നം എന്നിവയും നടന്നു.
Discussion about this post