തിരുവനന്തപുരം: പൊതുവിദ്യാലയങ്ങളിലെ വിദ്യാര്ത്ഥികളെ ജീവിതത്തിന്റെ എല്ലാ മേഖലകളിലും ജ്ഞാനമുള്ളവരാക്കാനാണ് പൊതുവിദ്യാഭ്യാസ സംരക്ഷണ യജ്ഞത്തിലൂടെ ശ്രമിക്കുന്നതെന്ന് പൊതുവിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് പറഞ്ഞു. കൈറ്റിന്റെ ആഭിമുഖ്യത്തില് സംഘടിപ്പിച്ച കുട്ടി റിപ്പോര്ട്ടര്മാര്ക്കുള്ള പരിശീലന ക്യാമ്പിന്റെ സംസ്ഥാനതല ഉദ്ഘാടനം നിര്വഹിക്കുകയായിരുന്നു അദ്ദേഹം.
വിവിധ തരം പരിശീലനം വിദ്യാര്ത്ഥികള്ക്ക് നല്കുന്നതിനൊപ്പം അതാത് മേഖലയിലെ യഥാര്ത്ഥ നൈതികത സംബന്ധിച്ചും പഠിപ്പിക്കുന്നു. ഓരോ മേഖലയിലെയും നൈതികത വിദ്യാര്ത്ഥി തിരിച്ചറിയുമ്പോഴാണ് പൊതുവിദ്യാഭ്യാസ സംരക്ഷണ യജ്ഞം വിജയമാകുന്നത്. വിവരശേഖരണവും അവ ഓര്മ്മിക്കുന്നുണ്ടോയെന്ന് പരിശോധിക്കലും മാത്രമല്ല പഠനം. വിദ്യാര്ത്ഥികള്ക്ക് ലഭിക്കുന്ന വിവരങ്ങളെ അറിവായി മാറ്റണം. വിദ്യാര്ത്ഥികള് വിവരങ്ങളുടെ ഉപഭോക്താക്കളല്ല, പകരം അറിവിന്റെ ഉദ്പാദകരാകണമെന്ന് മന്ത്രി പറഞ്ഞു. കുട്ടി റിപ്പോര്ട്ടര്മാരുടെ ചിത്രം കാമറയില് പകര്ത്തിയാണ് മന്ത്രി ചടങ്ങ് ഉദ്ഘാടനം ചെയ്തത്. കുട്ടികള് മന്ത്രിയുടെ ചിത്രവും കാമറകളില് പകര്ത്തി.
5710 ലിറ്റില് കൈറ്റ്സ് അംഗങ്ങളെയാണ് റിപ്പോര്ട്ടര്മാരായി സജ്ജമാക്കുന്നത്. വാര്ത്ത കണ്ടെത്തല്, സ്ക്രിപ്റ്റ് തയ്യാറാക്കല്, കാമറയുടെ പ്രവര്ത്തനം, ഫോട്ടോഗ്രഫി, വീഡിയോ ഷൂട്ടിംഗ്, ഓഡിയോ റിക്കോര്ഡിംഗ്, ഓഡിയോ മിക്സിംഗ്, വീഡിയോ എഡിറ്റിംഗ്, ടൈറ്റ്ലിംഗ്, ആങ്കറിംഗ് എന്നിവയിലെല്ലാം പരിശീലനം നല്കും. പൊതുവിദ്യാഭ്യസ വകുപ്പ് സെക്രട്ടറി എ. ഷാജഹാന് അധ്യക്ഷത വഹിച്ചു. കൈറ്റ് വൈസ്ചെയര്മാന് കെ. അന്വര് സാദത്ത് ചടങ്ങില് സംസാരിച്ചു.
Discussion about this post