കൊച്ചി: കൊച്ചി ദക്ഷിണ നാവികസേനാ ആസ്ഥാനത്ത് യുദ്ധവിമാനങ്ങളും ഹെലികോപ്റ്ററുകളും അറ്റകുറ്റപ്പണിക്കുവേണ്ടി നിര്ത്തുന്ന ഹാംഗറിന്റെ കൂറ്റന് ലോഹവാതില് തകര്ന്ന് രണ്ടു നാവികസേനാ ഉദ്യോഗസ്ഥര് മരിച്ചു. ചീഫ് പെറ്റി ഓഫീസര്മാരായ ഹരിയാന സ്വദേശി നവീന് (28), രാജസ്ഥാന് സ്വദേശി അജിത് സിംഗ് (29) എന്നിവരാണു മരിച്ചത്. ഇന്നലെ രാവിലെ ഒമ്പതിന് ഐഎന്എസ് ഗരുഡ എയര് സ്റ്റേഷനിലായിരുന്നു സംഭവം. നാവികസേന അന്വേഷണം പ്രഖ്യാപിച്ചിട്ടുണ്ട്. മരിച്ചവര് ഏവിയേഷന് ഇലക്ട്രിക്കല് ബ്രാഞ്ച് വിഭാഗം ഉദ്യോഗസ്ഥരാണ്. ഹാങ്ങറിനകത്തു യുദ്ധവിമാനങ്ങള് പരിശോധിക്കാന് നടന്നുനീങ്ങുന്നതിനിടെ ആറു മീറ്റര് ഉയരമുള്ള വാതില് തകര്ന്നു വീഴുകയായിരുന്നു. വാതിലിനടിയില്പ്പെട്ട ഇരുവരെയും ഏറെ പ്രയാസപ്പെട്ടാണു പുറത്തെടുത്തത്. ഉടന് നേവല് ബേസിലെ ഐഎന്എച്ച്എസ് സഞ്ജീവനി ആശുപത്രിയില് എത്തിച്ചെങ്കിലും 9.40ന് മരണം സംഭവിച്ചു. തലയ്ക്കും നെഞ്ചിനുമേറ്റ ക്ഷതമാണു മരണകാരണം.
യുദ്ധവിമാനങ്ങള് അറ്റകുറ്റപ്പണി നടത്തുന്ന ഹാങ്ങറിലാണ് അപകടമുണ്ടായതെന്നു പ്രതിരോധ വക്താവ് അറിയിച്ചു. വിമാനങ്ങളുടെ ഇലക്ട്രിക്കല് യന്ത്രങ്ങളാണ് ഈ വിഭാഗം പരിശോധിക്കുന്നത്. ഇരുവശത്തേക്കും റെയിലില് തള്ളിനീക്കാവുന്ന വാതിലുകളാണു ഹാങ്ങറിനുള്ളത്. ഇവയിലൊന്നു റെയിലില്നിന്നു വേര്പെട്ടു നിലംപതിക്കുകയായിരുന്നു. ഹരിയാനയിലെ ഭിവാനി സ്വദേശിയായ നവീന് 2008 ജനുവരിയിലാണു സേനയില് ചേര്ന്നത്. ആര്തിയാണു ഭാര്യ. രണ്ടു വയസുള്ള മകളുണ്ട്. 2009 നവംബറിലാണു രാജസ്ഥാനിലെ ഭരത്പുര് സ്വദേശി അജിത് സിംഗ് സേനാംഗമായത്. ഭാര്യ: പാര്വതി. അഞ്ചു വയസുള്ള മകനുണ്ട്. ഇന്ക്വസ്റ്റ് പൂര്ത്തിയാക്കി മൃതദേഹങ്ങള് മോര്ച്ചറിയിലേക്കു മാറ്റി. പോസ്റ്റ്മോര്ട്ടം ഇന്ന് എറണാകുളം ജനറല് ആശുപത്രിയില്. അപകടവിവരമറിഞ്ഞ് ഇരുവരുടെയും ബന്ധുക്കള് രാത്രിയോടെ കൊച്ചിയിലെത്തിയിട്ടുണ്ട്.
Discussion about this post