മലപ്പുറം: വഴിക്കടവിന് സമീപം വീണ്ടും മാവോയിസ്റ്റു സാന്നിധ്യം. താന്നിക്കടവ് ആദിവാസി കോളനിയിലാണ് തിങ്കളാഴ്ച രാത്രി 11ന് മാവോയിസ്റ്റ് സംഘം എത്തിയത്. തോക്കുമായെത്തിയ മൂന്നംഗ സംഘം ഒരു മണിക്കൂറോളം കോളനിയില് തങ്ങി. ആദിവാസികളെ ഭീഷണിപ്പെടുത്തി ഇവരുടെ കൈവശമുണ്ടായിരുന്ന അരിയും സാധനങ്ങളും വാങ്ങിയാണ് മാവോയിസ്റ്റുകള് മടങ്ങിയത്. കഴിഞ്ഞ ദിവസം വഴിക്കടവിനടുത്ത് മഞ്ചക്കോട്ട് വനിതാ മതിലിനെതിരെ മാവോയിസ്റ്റുകള് പോസ്റ്ററുകള് പതിച്ചിരുന്നു. വനിതാ മതില് വര്ഗീയ മതിലാണെന്ന് ചൂണ്ടിക്കാട്ടിയാണ് പോസ്റ്ററുകള് പതിച്ചിരിക്കുന്നത്. ശബരിമലയിലെത്തുന്ന സ്ത്രീകള്ക്ക് സര്ക്കാര് സംരക്ഷണം നല്കണമായിരുന്നവെന്നും സ്ത്രീകളെ തടയുന്ന ആര്എസ്എസിന് പഴഞ്ചന് ചിന്താഗതിയാണെന്നും പോസ്റ്ററില് വ്യക്തമാക്കിയിരുന്നു.
കണ്ണൂര് അന്പായത്തോടും ആയുധങ്ങളുമായി ശനിയാഴ്ച മാവോയിസ്റ്റുകള് എത്തിയിരുന്നു. പോലീസ് തിരയുന്ന സി.പി. മൊയ്തീന്റെ നേതൃത്വത്തിലുള്ള സംഘമാണ് എത്തിയത്. അന്പായത്തോട് ആയുധങ്ങളുമായി ജനങ്ങള്ക്കിടയിലൂടെ മാവോയിസ്റ്റുകള് പ്രകടനം നടത്തിയിരുന്നു. തോക്കേന്തിയവരടക്കം പത്തംഗ സംഘമാണ് കൊട്ടിയൂര് അന്പായത്തോട് ടൗണില് ശനിയാഴ്ച വൈകുന്നേരം ആറരയോടെ പ്രകടനം നടത്തിയത്. കൊട്ടിയൂര് വന്യജീവി സങ്കേതത്തില്നിന്നു കയറിവന്ന പത്തംഗ സംഘത്തില് ഒരു വനിതയടക്കം നാലു പേരാണ് തോക്കുംപിടിച്ച് പ്രകടനം നടത്തിയത്. മാവോയിസ്റ്റ് അനുകൂല ലഘുലേഖകള് വിതരണം ചെയ്ത ഇവര് ചുമരുകളില് പോസ്റ്ററുകള് പതിക്കുകയും ചെയ്തു. ബ്രാഹ്മണ്യത്തിന് ഡൈനാമിറ്റ് വയ്ക്കാന് വര്ഗസമരത്തിന് തിരികൊളുത്തുക, ബ്രാഹ്മണ്യ ഹിന്ദുത്വ ഫാസിസ്റ്റ് ശക്തികളെ ഈ മണ്ണില് കുഴിച്ചുമൂടാന് വിപ്ലവ ശക്തികളും ജനാധിപത്യ ശക്തികളും ആദിവാസികളും ദളിതരും സ്ത്രീകളും ന്യൂനപക്ഷങ്ങളും ഒറ്റക്കെട്ടായി പോരാടുക എന്നിങ്ങനെയാണ് പോസ്റ്ററുകളില് ഉണ്ടായിരുന്നത്.
Discussion about this post