തിരുവനന്തപുരം: കൊച്ചി മുനമ്പത്തുനിന്ന് ഇരുന്നൂറോളം പേര് വിദേശ രാജ്യങ്ങളിലേക്കു കടന്നുവെന്നു സംശയിക്കുന്ന സംഭവത്തില് വിദേശ അന്വേഷണ ഏജന്സികളുടെ സഹകരണം തേടാന് പോലീസ്. ഇതിനുള്ള നടപടികള് സംസ്ഥാന പോലീസ് ആസ്ഥാനത്തു ആരംഭിച്ചു. ഇതിനു മുന്നോടിയായി വിവരങ്ങള് കേന്ദ്രത്തെ ധരിപ്പിക്കുകയും നയതന്ത്ര ഇടപടലുകള്ക്കുള്ള നടപടിക്രമങ്ങള് ആരംഭിക്കുകയും ചെയ്തു. മുനമ്പത്തു നിന്നു പോയവര് ഓസ്ട്രേലിയയിലേക്കും ന്യൂസിലന്ഡിലേക്കും കടന്നതായാണു വിവരം. കേസന്വേഷണ റിപ്പോര്ട്ടുകള് കേന്ദ്ര ഏജന്സിക്കു കൈമാറിയിട്ടുമുണ്ട്. ഇരുന്നൂറോളം പേര് വിദേശത്തേക്കു കടന്നുവെന്ന സംശയം രാജ്യാന്തര സ്വഭാവമുള്ളതായതിനാലാണ് വിദേശ അന്വേഷണ ഏജന്സികളുടെ സഹകരണത്തിനു ശ്രമിക്കുന്നത്. ഒപ്പം നയതന്ത്ര ഇടപെടലുകള്ക്കും ശ്രമം ആരംഭിച്ചുകഴിഞ്ഞു. മുമ്പും കേരളത്തില് മനുഷ്യക്കടത്തിനുള്ള ശ്രമങ്ങളുണ്ടായെന്ന വിവരത്തിന്റെ അടിസ്ഥാനത്തില് അക്കാര്യങ്ങളും അന്വേഷണസംഘം പരിശോധിക്കുന്നുണ്ട്. കൊല്ലം കേന്ദ്രീകരിച്ചുള്ള ഈ ശ്രമങ്ങളുടെ കൂടുതല് വിവരങ്ങള് അന്വേഷണ സംഘം ശേഖരിക്കുകയാണ്.
മുനമ്പം മനുഷ്യക്കടത്തിന്റെ സൂത്രധാരന് ശ്രീകാന്തന്റെ വെങ്ങാനൂര് ചാവടിനടയിലെ വീട്ടില് പോലീസ് നടത്തിയ പരിശോധനയില് തമിഴില് എഴുതിയ ചില രേഖകള് പോലീസ് കണ്ടെടുത്തിട്ടുണ്ട്. ഇതു പരിശോധിച്ചു വരികയാണ്. വീട്ടില് കണ്ടെത്തിയ നാണയക്കിഴികള് സംബന്ധിച്ചും പോലീസ് വിവരങ്ങള് ശേഖരിക്കുന്നുണ്ട്. ശ്രീകാന്തന്റെ വീട്ടില് നടന്ന പരിശോധനയില് സ്വിസ് ബാങ്ക് നിക്ഷേപരേഖകള് ലഭിച്ചതിനെ തുടര്ന്ന് കഴിഞ്ഞ ദിവസം കൂടുതല് പരിശോധനകള് നടന്നുവെങ്കിലും മറ്റു രേഖകളൊന്നും ലഭിച്ചില്ല. ആറു പാസ്പോര്ട്ടുകള്, ബാങ്ക് പാസ് ബുക്കുകള്, ചെക്കുകള്, ആധാരങ്ങള് എന്നിവ കണ്ടെത്തിയിരുന്നു. മനുഷ്യക്കടത്ത് കേസില് അറസ്റ്റിലായ ഇയാളുടെ കൂട്ടാളി അനില്കുമാറിനെ വെങ്ങാനൂരില് എത്തിച്ച് തെളിവെടുക്കുന്നതു സുരക്ഷാപ്രശ്നം കണക്കിലെടുത്തു മാറ്റിവച്ചിരിക്കുകയാണ്. സുരക്ഷാക്രമീകരണം ഏര്പ്പെടുത്തിയശേഷം തെളിവെടുപ്പ് നടത്തും.
Discussion about this post