തിരുവനന്തപുരം: കണ്ണൂര് വിമാനത്താവളത്തില്നിന്ന് കൂടുതല് അന്താരാഷ്ട്ര, ആഭ്യന്തര സര്വീസ് ആരംഭിക്കുമെന്ന് വിമാനക്കമ്പനികള് മുഖ്യമന്ത്രി പിണറായി വിജയന് ഉറപ്പുനല്കി. വിമാനക്കമ്പനി സിഇഒമാരുമായി നടത്തിയ യോഗത്തിലാണ് ഉറപ്പു ലഭിച്ചത്. കണ്ണൂര് വിമാനത്താവളത്തില് നിന്ന് ഗള്ഫ് മേഖലയിലേക്ക് മറ്റു വിമാനത്താവളങ്ങളിലേക്കാള് അമിതനിരക്ക് ഈടാക്കുന്നത് കുറയ്ക്കാന് എയര് ഇന്ത്യ തയാറാകണമെന്ന് മുഖ്യമന്ത്രി ആവശ്യപ്പെട്ടു. കണ്ണൂര് അന്താരാഷ്ട്ര വിമാനത്താവളത്തില്നിന്ന് ഗള്ഫ് രാജ്യങ്ങളായ ദുബായ്, ഷാര്ജ, അബുദാബി, മസ്കറ്റ്, ദോഹ, ബഹ്റൈന്, റിയാദ്, കുവൈത്ത്, ജിദ്ദ തുടങ്ങിയ മേഖലകളിലേക്ക് കൂടുതല് സര്വീസുകള് ആവശ്യമാണ്. സിംഗപ്പുര്, മലേഷ്യ എന്നിവിടങ്ങളിലേക്കും വര്ധിച്ച ആവശ്യമുണ്ട്. നിലവില് എയര് ഇന്ത്യാ എക്സ്പ്രസാണ് നാല് അന്താരാഷ്ട്ര സര്വീസുകള് കണ്ണൂരില്നിന്നു നടത്തുന്നത്. കണ്ണൂരില് വിദേശ വിമാനക്കമ്പനികള്ക്ക് സര്വീസിനുള്ള അനുമതി നല്കിയിട്ടില്ല. സിവില് ഏവിയേഷന് മന്ത്രാലയം ഇക്കാര്യത്തില് തീരുമാനം പുനഃപരിശോധിക്കണം. കണ്ണൂര് വിമാനത്താവളത്തിന്റെ വികസനത്തിന് ഇതാവശ്യമാണ്. കണ്ണൂരില്നിന്നുള്ള വിമാനങ്ങള്ക്കുള്ള ഏവിയേഷന് ടര്ബൈന് ഫ്യൂവലിനുള്ള നികുതി നേരത്തേതന്നെ ഒരു ശതമാനമായി കുറച്ചിരുന്നു. ശബരിമല വിമാനത്താവളത്തിനുള്ള സാധ്യതാപഠന റിപ്പോര്ട്ട് സര്ക്കാര് പരിഗണനയിലാണ്. കാസര്ഗോട്ടെ ബേക്കല്, ഇടുക്കി, വയനാട് എന്നിവിടങ്ങളില് എയര്സ്ട്രിപ്പ് ആരംഭിക്കുന്നതും സര്ക്കാര് പരിഗണനയിലാണെന്ന് അദ്ദേഹം അറിയിച്ചു. എയര് ഇന്ത്യയുടെ കണ്ണൂരില് നിന്നുള്ള അമിതനിരക്കുകള് കുറയ്ക്കാന് നിര്ദേശം നല്കിയതായി എയര് ഇന്ത്യ സിഎംഡി പി.എസ്. ഖരോള മുഖ്യമന്ത്രിയെ അറിയിച്ചു. വടക്കേ ഇന്ത്യയിലെ പ്രമുഖ വിമാനത്താവളങ്ങളിലേക്ക് കൂടുതല് ആഭ്യന്തര സര്വീസുകള് വേനല്ക്കാല ഷെഡ്യൂളില് ആരംഭിക്കുമെന്നും അദ്ദേഹം അറിയിച്ചു.
എയര് ഇന്ത്യാ എക്സ്പ്രസ് കണ്ണൂരില്നിന്ന് മൂന്നു രാജ്യങ്ങളിലേക്കുകൂടി മാര്ച്ചോടെ സര്വീസ് ആരംഭിക്കുമെന്ന് സിഇഒ കെ. ശ്യാംസുന്ദര് യോഗത്തില് അറിയിച്ചു. ബഹ്റൈന്, കുവൈത്ത്, മസ്കറ്റ് എന്നിവിടങ്ങളിലേക്കാണ് പുതിയ സര്വീസുകള്. തിരുവനന്തപുരം- കണ്ണൂര് സര്വീസിനുള്ള സാധ്യത പരിശോധിക്കുമെന്നും അദ്ദേഹം പറഞ്ഞു. ഇന്ഡിഗോ എയര്ലൈന്സ് കണ്ണൂരില്നിന്ന് ബംഗളൂരു, ഹൈദരാബാദ്, ചെന്നൈ, ഹൂബ്ളി, ഗോവ എന്നിവിടങ്ങളിലേക്ക് 25ന് സര്വീസ് ആരംഭിക്കുമെന്ന് കമ്പനി പ്രതിനിധികള് അറിയിച്ചു. കണ്ണൂരില് നിന്ന് തിരുവനന്തപുരത്തേക്കുള്ള സര്വീസ് മാര്ച്ച് അവസാനം ആരംഭിക്കും. ദോഹ, കുവൈത്ത് എന്നിവിടങ്ങളിലേക്ക് മാര്ച്ചിലും രണ്ടു മാസങ്ങള്ക്കുള്ളില് ജിദ്ദ, ദമാം എന്നിവിടങ്ങളിലേക്കും സര്വീസ് ആരംഭിക്കുന്നതു പരിഗണനയിലുണ്ട്. കണ്ണൂരില്നിന്ന് ബംഗളൂരു, ഹൈദരാബാദ്, മുംബൈ എന്നിവിടങ്ങളിലേക്കും മസ്കറ്റിലേക്കും സര്വീസ് ആരംഭിക്കുമെന്ന് ഗോ എയര് അധികൃതര് അറിയിച്ചു. സ്പൈസ് ജെറ്റ് അധികൃതര് കണ്ണൂരില്നിന്ന് ബംഗളൂരു, ചെന്നൈ എന്നിവിടങ്ങളിലേക്ക് സര്വീസ് ആരംഭിക്കുമെന്നും അറിയിച്ചു. കൂടുതല് സര്വീസുകള് ആരംഭിക്കുന്നതിനുള്ള സാധ്യതകള് പരിശോധിക്കുമെന്ന് വിദേശ വിമാനക്കമ്പനികളുടെ പ്രതിനിധികളും അറിയിച്ചു. പത്ത് ആഭ്യന്തര കമ്പനികളുടെയും 12 അന്താരാഷ്ട്ര കമ്പനികളുടേയും പ്രതിനിധികളാണ് യോഗത്തില് പങ്കെടുത്തത്.
