തിരുവനന്തപുരം: സര്വതല സ്പര്ശിയായ വികസനമാണ് നവകേരളത്തിന് വേണ്ടതെന്ന് മുഖ്യമന്ത്രി പിണറായി വിജയന് പറഞ്ഞു. കേരള സര്വകലാശാലയില് ഇക്കണോമിക്സ് ഇന്റര് യൂണിവേഴ്സിറ്റി സെന്റര് സംഘടിപ്പിച്ച കേരള സമ്പദ്വ്യവസ്ഥ പുനസംഘടന: ബദല് കാഴ്ചപ്പാട് എന്ന വിഷയത്തിലെ അന്തര്ദ്ദേശീയ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
കേരളത്തെ പുനര്നിര്മിക്കുമ്പോള് യുവജനതയ്ക്കും പ്രവാസികള്ക്കും അവസരം ഒരുക്കി നല്കാനും ശ്രദ്ധിക്കേണ്ടതുണ്ട്. കേരളത്തിന്റെ പൊതുപുരോഗതി വിലയിരുത്തുമ്പോള് ഭൂപരിഷ്കരണത്തിനൊപ്പം പ്രവാസികളുടെ സംഭാവനയും വലുതാണ്. എന്നാല് വിദേശങ്ങളില് നിന്ന് മടങ്ങി വരുന്ന പ്രവാസികളുടെ എണ്ണം വര്ദ്ധിച്ചിരിക്കുകയാണ്. കേരളത്തില് പുതിയ തൊഴില് അവസരങ്ങള് സൃഷ്ടിക്കേണ്ടതുണ്ട്. പ്രവാസികളെപ്പോലെ തന്നെ യുവതയ്ക്കും ഇവിടെ തൊഴില് അവസരങ്ങള് ഉറപ്പാക്കണം. പഠിക്കുന്ന വിഷയങ്ങള്ക്കും യോഗ്യതയ്ക്കും അനുസരിച്ച് ജോലി ലഭിക്കണം. ഇതിനുതകുന്ന പരിപാടികള് സര്ക്കാര് ആസൂത്രണം ചെയ്യുന്നുണ്ട്ണ ഉന്നത വിദ്യാഭ്യാസ മേഖലയില്, പ്രത്യേകിച്ച് പ്രൊഫഷണല് കോഴ്സുകളില്, കാലാനുസൃതമായ മാറ്റം ആവശ്യമാണ്.
മടങ്ങിയെത്തുന്ന പ്രവാസികള്ക്ക് ചില മേഖലയില് നിക്ഷേപം നടത്താനും സംരംഭകത്വം ഉറപ്പ് വരുത്താനും നടപടികള് ആരംഭിച്ചിട്ടുണ്ട്. പ്രവാസി നിക്ഷേപം വലിയ രീതിയില് സമാഹരിക്കാന് നടപടി ആരംഭിച്ചിട്ടുണ്ട്. പ്രവാസികളുടെ നിക്ഷേപം കിഫ്ബി ബോണ്ടിലൂടെയും കെ. എസ്. എഫ്. ഇ ചിട്ടിയിലൂടെയും സമാഹരിക്കുന്നു. ഇതിനെല്ലാം സര്ക്കാരിന്റെ പൂര്ണ ഗ്യാരണ്ടി ഉണ്ടെന്നതാണ് പ്രത്യേകതയെന്നും അദ്ദേഹം പറഞ്ഞു.
കേരള സര്വകലാശാല വൈസ് ചാന്സലര് ഡോ. വി. പി. മഹാദേവന് പിള്ള, ഇക്കണോമിക്സ് വകുപ്പ് മേധാവി പ്രൊഫ. അബ്ദുള് സലീം, പ്രൊഫ. പ്രഭാത് പട്നായിക്, പ്രൊഫ. എം. എ, ഉമ്മന്, ഡോ. കെ. പി. കണ്ണന് എന്നിവര് സംസാരിച്ചു.
Discussion about this post