തൃശൂര്: വാട്ടര്കണക്ഷന് ചാര്ജ്ജ് മാസത്തവണകളായി അടച്ചു തീര്ക്കാവുന്ന പദ്ധതിയ്ക്ക് സര്ക്കാര് രൂപം നല്കുമെന്ന് സംസ്ഥാന ജലവിഭവവകുപ്പ് മന്ത്രി കെ. കൃഷ്ണന്കുട്ടി. തുക ഒന്നിച്ചടയ്ക്കാന് സാധിക്കാത്തതിനാല് ജനങ്ങള് കുടിവെള്ളക്ഷാമം നേരിടുന്ന അവസ്ഥ ഒഴിവാക്കാനാണിത്. ഇത്തരം സാഹചര്യത്തില് വാട്ടര് അതോറിറ്റി അപേക്ഷകര്ക്ക് കണക്ഷന് നല്കുകയും തവണകളായി അത് പിരിച്ചെടുക്കുകയും വേണം. പഞ്ചായത്തും ജനപ്രതിനിധികളും ഇതിന് വേണ്ട സഹായം ജനങ്ങള്ക്ക് നല്കണമെന്നും അദ്ദേഹം പറഞ്ഞു. പടിയൂര് പഞ്ചായത്തില് സമഗ്രകുടിവെള്ളപദ്ധതിയുടെ ഭാഗമായി കുടിവെള്ളവിതരണശൃംഖലയുടെയും ഉന്നതതലജലസംഭരണിയുടെയും ഉദ്ഘാടനം എടതിരിഞ്ഞി ജങ്ക്ഷനില് നിര്വ്വഹിച്ചു സംസാരിക്കുകയായിരുന്നു അദ്ദേഹം.
ലോറിയില് കുടിവെള്ളം എത്തുന്ന പ്രദേശങ്ങളില് പൈപ്പ് വെള്ളമെത്തിക്കാനുള്ള അടിയന്തരപദ്ധതിക്കും രൂപം നല്കും. ജലക്ഷാമം മൂലം ഏറ്റവുമധികം കഷ്ടതയനുഭവിക്കുന്നത് സ്ത്രീകളാണ്. പദ്ധതികള് കാലാവധിയ്ക്ക് മുമ്പ് തന്നെ ചെയ്ത് തീര്ക്കാവുന്ന സംവിധാനം നടപ്പില് വരുത്താനാണ് സര്ക്കാരിന്റെ ശ്രമമെന്നും അദ്ദേഹം കൂട്ടിച്ചേര്ത്തു.
Discussion about this post