പത്തനംതിട്ട: അയോധ്യയും ശബരിമലയും ഒരുപോലെയാണെന്നും രണ്ടും ഹിന്ദുവിന്റെ ആത്മാഭിമാനം ഉയര്ത്തിയിട്ടുണ്ടെന്നും ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് പറഞ്ഞു. തിരുവനന്തപുരം, ആറ്റിങ്ങല്, കൊല്ലം, പത്തനംതിട്ട പാര്ലമെന്റ് മണ്ഡലങ്ങളിലെ ബി.ജെ.പി ശക്തികേന്ദ്ര പ്രവര്ത്തകരുടെ യോഗം ഉദ്ഘാടനം ചെയ്യുകയായിരുന്നു അദ്ദേഹം. അയോദ്ധ്യ പ്രക്ഷോഭം പോലെ പ്രധാനപ്പെട്ടതാണ് ശബരിമല പ്രക്ഷോഭമെന്നും അദ്ദേഹം പറഞ്ഞു.
നേരത്തെ പത്തനംതിട്ട ലോക്സഭാ മണ്ഡലത്തിലെ ബൂത്ത് പ്രവര്ത്തക കണ്വെന്ഷനും യോഗി ആദിത്യനാഥ് ഉദ്ഘാടനം ചെയ്തിരുന്നു. ശബരിമലയെയും വിശ്വാസങ്ങളെയും തകര്ക്കുന്ന പിണറായി സര്ക്കാരിന് ലോക്സഭാ തിരഞ്ഞെടുപ്പില് ശക്തമായ തിരിച്ചടി നല്കണമെന്ന് യോഗി ആദിത്യനാഥ് പറഞ്ഞു.
ഉത്തര്പ്രദേശിലെ കുംഭമേളയ്ക്കെത്തുന്ന 21 കോടി ഭക്തര്ക്ക് വേണ്ട എല്ലാ സൗകര്യവും മോദി സര്ക്കാരിന്റെ സഹായത്തോടെ ചെയ്തുകൊടുക്കുന്നു. അയ്യപ്പന്റെ ജന്മസ്ഥലമായ ശബരിമലയെയും വിശ്വാസത്തെയും സുപ്രീംകാേടതി വിധിയുടെ മറവില് ഇല്ലാതാക്കാനാണ് പിണറായി സര്ക്കാര് ശ്രമിക്കുന്നത്.
മോദി സര്ക്കാരിന്റെ ഭരണം രാജ്യത്തിന്റെ ആത്മാഭിമാനം ഉയര്ത്തി. രാജ്യം തകരണമെന്നും അഴിമതിയും ഭീകരവാദവും വളരണമെന്നും ആഗ്രഹിക്കുന്നവര് മോദിക്കെതിരെ ഒന്നിച്ചിരിക്കുകയാണ്. മോദി വീണ്ടും അധികാരത്തില് വരുമെന്നും അദ്ദേഹം പറഞ്ഞു.
ശബരിമല ക്ഷേത്രത്തിന്റെ മാതൃക ബി.ജെ.പി സംസ്ഥാന പ്രസിഡന്റ് പി.എസ്. ശ്രീധരന്പിള്ളയും ജില്ലാ പ്രസിഡന്റ് അശോകന് കുളനടയും ചേര്ന്ന് യോഗി ആദിത്യനാഥിന് സമ്മാനിച്ചു. സംസ്ഥാന ജനറല് സെക്രട്ടറി ശോഭാ സുരേന്ദ്രന് അദ്ധ്യക്ഷത വഹിച്ചു. ജനറല് സെക്രട്ടറി എം.ടി. രമേശ്, സെക്രട്ടറി സി. ശിവന്കുട്ടി, സംസ്ഥാന സമിതിയംഗം ടി.ആര്. അജിത്കുമാര്, കോട്ടയം ജില്ലാ പ്രസിഡന്റ് എന്. ഹരി തുടങ്ങിയവര് പങ്കെടുത്തു.
Discussion about this post