തിരുവനന്തപുരം: ട്രാവന്കൂര് ടൈറ്റാനിയം പ്രോഡക്ട്സിലെ ജീവനക്കാരുടെ ശമ്പളപരിഷ്കരണം ഉടന് നടത്തുമെന്ന് വ്യവസായ മന്ത്രി ഇ. പി. ജയരാജന് പറഞ്ഞു. ടൈറ്റാനിയം പ്രോഡക്ട്സ് സമ്പൂര്ണ്ണ പരിസ്ഥിതി പ്രക്രിയയിലൂടെ വികസിപ്പിച്ചെടുത്ത മൂല്യവര്ധിത ഉല്പന്നങ്ങളുടെ വിതരണോദ്ഘാടനവും കമ്പനിയുടെ അതിഥി മന്ദിര ശിലാസ്ഥാപനവും നിര്വഹിക്കുകയായിരുന്നു അദ്ദേഹം. തൊഴില് സാധ്യത വര്ധിപ്പിച്ച് ടൈറ്റാനിയത്തിന്റെ വികസനം വര്ധിപ്പിക്കണം. പൊതുമേഖലയിലെയും സ്വകാര്യമേഖലയിലെയും വ്യവസായങ്ങളെ പ്രോത്സാഹിപ്പിക്കുക എന്നതാണ് സര്ക്കാരിന്റെ നയം. അന്താരാഷ്ട്ര കമ്പനികള് കേരളത്തില് നിക്ഷേപത്തിനെത്തുന്നുണ്ട്. നിക്ഷേപ സാധ്യതയുള്ള നാടായി കേരളത്തെ മാറ്റും. കേരളത്തിന്റെ ഉല്പന്നങ്ങള്ക്ക് വിദേശ വിപണി ലഭ്യമാക്കുമെന്നും മന്ത്രി പറഞ്ഞു. നാടിന്റെ പ്രശ്നം ശരിയായി നിരീക്ഷിച്ച് ജനങ്ങളുടെ പ്രശ്നങ്ങള്ക്ക് പരിഹാരം കാണാന് വ്യവസായങ്ങള് ഉപകരിക്കണമെന്നും അദ്ദേഹം പറഞ്ഞു.
റോഡിന്റെ ഇരുവശങ്ങളിലും മധ്യഭാഗത്തും വരകള് ഇടുന്നതിനുള്ള അജന്റോക്സ് ആര്. എം. ഡബ്ല്യു റോഡ് മാര്ക്കിംഗ് പെയിന്റ്, പ്ലാസ്റ്റിക്, ടൈല് തുടങ്ങിയവയുടെ നിര്മ്മാണത്തില് നിറങ്ങള് നല്കുന്നതിന് ഉപയോഗിക്കുന്ന അയണ് ഓക്സൈഡ്, അജന്റോക്സ് ജിപ്സം, അജന്റോക്സ് സിമെന്റ് ബ്രിക്ക്, ഇന്റര്ലോക്ക് ടൈല് എന്നിവയുടെ വിതരണോദ്ഘാടനമാണ് മന്ത്രി നിര്വഹിച്ചത്. കമ്പനി വളപ്പില് നിര്മ്മിക്കുന്ന അതിഥി മന്ദിരത്തിന്റെ ശിലാസ്ഥാപനവും 2021 ലെ പ്ലാറ്റിനം ജൂബിലി ആഘോഷങ്ങളുടെ ലോഗോ പ്രകാശനവും മന്ത്രി നിര്വഹിച്ചു.
ചടങ്ങില് സി. ദിവാകരന് എം. എല്. എ. അധ്യക്ഷത വഹിച്ചു. ശശി തരൂര് എം. പി, മുന് എം. എല്. എ. ആനത്തലവട്ടം ആനന്ദന്, ടി. ടി. പി. എല് ചെയര്മാന് അഡ്വ. എ.എ. റഷീദ്, മാനേജിംഗ് ഡയറക്ടര് ജോര്ജീ നൈനാന്, എന്. ശശിധരന് നായര്, സോളമന് വെട്ടുകാട്, ക്ലൈനസ് റൊസാരിയോ, തോമസ് എം. ജെ, പ്രസന്നകുമാരന് സി.എസ്, ബിനുരാജ് വി, തുടങ്ങിയവര് സംബന്ധിച്ചു.
Discussion about this post