തിരുവനന്തപുരം: കുഷ്ഠരോഗ ബാധിതരുടെ എണ്ണം കൂടുതലായി റിപ്പോര്ട്ട് ചെയ്ത എട്ട് ജില്ലകളില് ആരോഗ്യവകുപ്പ് നടപ്പിലാക്കിയ കുഷ്ഠരോഗ നിര്ണയ പ്രചാരണ ക്യാമ്പയിന് അശ്വമേധം വന് വിജയമായ സാഹചര്യത്തില് ബാക്കിയുള്ള ആറ് ജില്ലകളില്ക്കൂടി നടപ്പിലാക്കാന് തീരുമാനിച്ചതായി ആരോഗ്യ മന്ത്രി കെ.കെ. ശൈലജ പറഞ്ഞു. കൊല്ലം, പത്തനംതിട്ട, ആലപ്പുഴ, ഇടുക്കി, കോട്ടയം, വയനാട് എന്നീ ജില്ലകളില് ഏപ്രില്/മേയ് മാസങ്ങളില് അശ്വമേധം ക്യാമ്പയിന് നടപ്പിലാക്കുന്നതിനുളള കര്മ്മ പദ്ധതിയാണ് ആവിഷ്ക്കരിച്ചു വരുന്നത്. സംസ്ഥാനത്തെ മുഴുവന് രോഗബാധിതരെയും കണ്ടെത്തി യഥാസമയം ചികിത്സയ്ക്ക് വിധേയമാക്കിയാല് മാത്രമേ രോഗപ്പകര്ച്ച തടയാനും അതുവഴി കുഷ്ഠരോഗ നിര്മ്മാര്ജ്ജനം എന്ന ലക്ഷ്യം കൈവരിക്കാനും സാധിക്കുകയുളളൂവെന്നും മന്ത്രി വ്യക്തമാക്കി.
തിരുവനന്തപുരം, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, കണ്ണൂര്, കാസര്കോട് എന്നീ എട്ട് ജില്ലകളില് 2018 ഡിസംബര് അഞ്ച് മുതല് 18 വരെയാണ് അശ്വമേധം പ്രചാരണ ക്യാമ്പയിന് സംഘടിപ്പിച്ചത്. സമഗ്രമായ പ്രവര്ത്തന തന്ത്രം ആസൂത്രണം ചെയ്ത് വ്യക്തമായ ദിശാബോധത്തോടെ നടപ്പിലാക്കിയ ഈ ക്യാമ്പയിനിലൂടെ പുതുതായി 194 കുഷ്ഠരോഗ ബാധിതരെ കണ്ടെത്തി ചികിത്സയ്ക്ക് വിധേയമാക്കാന് സാധിച്ചു. 56,732 വോളന്റിയര്മാര് ഡോക്ടര്മാരുടെയും, സൂപ്പര്വൈസര്മാരുടെയും മേല്നോട്ടത്തില് 14 ദിവസം കൊണ്ടാണ് ഈ നേട്ടം കൈവരിച്ചത്.
ആരോഗ്യവകുപ്പിലെ പ്രാഥമിക ആരോഗ്യ കേന്ദ്രങ്ങള് മുതല് മെഡിക്കല് കോളേജുകള് വരെയുളള ആശുപത്രികളിലും പ്രവര്ത്തിച്ച അശ്വമേധം കോര്ണറിലൂടെയാണ് ഈ നേട്ടം കൈവരിക്കാന് സാധിച്ചത്. വിവിധ സര്ക്കാര് വകുപ്പുകളുടെയും മെഡിക്കല് സംഘടനകളുടെയും സഹകരണം ക്യാമ്പയിന് വിജയിപ്പിക്കുന്നതിന് സഹായകമായി. ആശാ, അംഗനവാടി, കുടുംബശ്രീ പ്രവര്ത്തകരും, സന്നദ്ധ സംഘടനാ പ്രവര്ത്തകരും ആരോഗ്യവകുപ്പ് ജീവനക്കാരോടൊപ്പം ഈ സംരംഭത്തില് പങ്കാളികളായതായും മന്ത്രി പറഞ്ഞു.
Discussion about this post