തിരുവനന്തപുരം: സംസ്ഥാനത്തെ എല്ലാ ട്രഷറികള്ക്കും അടുത്ത രണ്ട് വര്ഷത്തിനുള്ളില് സ്വന്തമായി കെട്ടിടം ലഭ്യമാക്കുമെന്ന് ധനമന്ത്രി ഡോ. തോമസ് ഐസക്. തിരുവനന്തപുരം പട്ടത്ത് ട്രഷറി ആസ്ഥാന മന്ദിരത്തിന്റെ ശിലാസ്ഥാപന കര്മ്മം നിര്വഹിക്കുകയായിരുന്നു അദ്ദേഹം. ട്രഷറി ഓഫീസുകളുടെ നവീകരണം, ഇന്റഗ്രേറ്റഡ് ഫിനാന്ഷ്യല് മാനേജ്മെന്റ് എന്നിവയും 2021 നുള്ളില് പൂര്ത്തിയാക്കും. ആസ്ഥാന മന്ദിരത്തിന്റെ നിര്മ്മാണമുള്പ്പെടെ സമയബന്ധിതമായി പൂര്ത്തിയാക്കി ഭരണനവീകരണത്തിന് ട്രഷറി വകുപ്പ് മാതൃക കാട്ടുമെന്നും ഈ സര്ക്കാര് 1000 ദിനം പിന്നിടുമ്പോള് ഒരു കാലത്തുമില്ലാത്ത നിര്മ്മാണ പ്രവൃത്തികളാണ് കേരളത്തില് നടക്കുന്നതെന്നും മന്ത്രി പറഞ്ഞു.
കാലത്തിന്റെ മാറ്റത്തിനനുസരിച്ച് സര്ക്കാര് സംവിധാനങ്ങളും ആധുനിക രീതിയിലേക്ക് മാറിയെന്ന് ചടങ്ങില് അധ്യക്ഷത വഹിച്ച കെ. മുരളീധരന് എം. എല്. എ. പറഞ്ഞു. ധനകാര്യ അഡീ. ചീഫ് സെക്രട്ടറി മനോജ് ജോഷി റിപ്പോര്ട്ട് അവതരിപ്പിച്ചു. മേയര് വി. കെ. പ്രശാന്ത്, പട്ടം വാര്ഡ് കൗണ്സിലര് രമ്യാ രമേശ്, ട്രഷറി ഡയറക്ടര് എ. എം. ജാഫര് തുടങ്ങിയവര് സംസാരിച്ചു.
പട്ടം വില്ലേജോഫീസിന് സമീപത്തായി സര്ക്കാര് നല്കിയ 38 സെന്റ് ഭൂമിയിലാണ് അത്യാധുനിക സൗകര്യമുള്ള ട്രഷറി ആസ്ഥാന മന്ദിരം നിര്മ്മിക്കുന്നത്.
Discussion about this post