തിരുവനന്തപുരം: നിക്ഷേപ, സംരംഭരംഗങ്ങളിലേക്ക് സ്ത്രീകള് സധൈര്യം മുന്നോട്ടുവരണമെന്ന് ഗവര്ണര് പി. സദാശിവം. നവസംരംഭങ്ങളെക്കുറിച്ചും തങ്ങളുടെ ആശയങ്ങളെക്കുറിച്ചും ഉറക്കെ വിളിച്ചുപറയാന് സ്ത്രീകള് തയ്യാറാകണമെന്നും ഗവര്ണര് പറഞ്ഞു. കേരള സംസ്ഥാന വനിതാ വികസന കോര്പ്പറേഷന് സംഘടിപ്പിക്കുന്ന വനിതാ സംരംഭകരുടെ കൂട്ടായ്മ നവാംഗന 2019 തിരുവനന്തപുരത്ത് ജവഹര് സഹകരണ ഭവന് ഓഡിറ്റോറിയത്തില് ഉദ്ഘാടനം ചെയ്യുകയായിരുന്നു അദ്ദേഹം.
സ്ത്രീകളുടെ ആശയങ്ങളും അനുഭവങ്ങളും ഭാവിസമൂഹത്തിനായി വിനിയോഗിക്കണം. സമൂഹത്തിന്റെ മുന്ധാരയിലേക്ക് സ്ത്രീകള് കടന്നുവരുന്നത് പൂര്ണമായി അംഗീകരിക്കാന് ഇന്നും സമൂഹത്തിനായിട്ടില്ല. ഈ മനോഭാവത്തെ മറികടക്കാന് പല വനിതാ സംരംഭകര്ക്കുമായിട്ടുണ്ട്. മീറ്റില് പങ്കെടുക്കാനെത്തിയ ഭിന്നശേഷിയുള്ള നവസംരംഭക തീര്ഥ നിര്മ്മലിനെ പോലുള്ളവരെ മാതൃകയാക്കണമെന്നും അദ്ദേഹം പറഞ്ഞു. ബിസിനസ്, സംരംഭകരംഗത്തേക്ക് കടന്നുവരുന്നവര് ബന്ധപ്പെട്ട മേഖലകളിലെ നിയമവശങ്ങള് മനസിലാക്കിയിരിക്കണം. തൊഴില്, പരിസ്ഥിതി നിയമങ്ങള് സംബന്ധിച്ച് വ്യക്തമായി അറിവ് നേടിയിരിക്കണമെന്നും ഗവര്ണര് പറഞ്ഞു.
രാജ്യത്തിന്റെ ജി.ഡി. പി വര്ധിപ്പിക്കാനും സാമ്പത്തികപ്രശ്നങ്ങള്ക്ക് പരിഹാരം കാണാനും ഏതെങ്കിലും മേഖലകളില് സ്ത്രീകള് ജോലി ചെയ്യണമെന്ന് ചടങ്ങില് അധ്യക്ഷത വഹിച്ച ആരോഗ്യ, വനിതാ, ശിശുവികസന വകുപ്പ് മന്ത്രി കെ. കെ. ശൈലജ ടീച്ചര് പറഞ്ഞു. കുടുംബത്തില് എത്ര വരുമാനമുണ്ടെങ്കിലും പൊതുവിടങ്ങളില് അധ്വാനിക്കാന് സ്ത്രീകള് തയ്യാറാകണം. കേരളത്തിലും സ്ത്രീകളോട് രണ്ടാംതര മനോഭാവം നിലനില്ക്കുന്നുണ്ട്. കുടുംബത്തിലുപരി സമൂഹത്തിലെ ഉത്തരവാദിത്വങ്ങള് കൂടി ഏറ്റെടുക്കാന് സ്ത്രീകള് മുന്നോട്ടുവരണമെന്നും മന്ത്രി പറഞ്ഞു.
കെ. മുരളീധരന് എം.എല്.എ, വനിതാശിശുവികസന വകുപ്പ് സ്പെഷ്യല് സെക്രട്ടറി ബിജു പ്രഭാകര്, ഡയറക്ടര് ഷീബ ജോര്ജ്, വനിതാ വികസന കോര്പ്പറേഷന് മാനേജിംഗ് ഡയറക്ടര് ബിന്ദു വി.സി, ചെയര്പേഴ്സണ് കെ.എസ്. സലീഖ തുടങ്ങിയവര് സംസാരിച്ചു. നവസംരംഭകരായ സ്ത്രീകളും വിദ്യാര്ത്ഥിനികളും തങ്ങളുടെ സംരംഭങ്ങള് സംബന്ധിച്ച് അവതരണം നടത്തി. അന്താരാഷ്ട്ര വനിതാദിനത്തോടനുബന്ധിച്ച് വിവിധ ജില്ലകളിലായി ഒരാഴ്ച നീളുന്ന പരിപാടികളാണ് വനിതാ, ശിശുവികസന വകുപ്പ് സംഘടിപ്പിച്ചിരിക്കുന്നത്.
Discussion about this post