തിരുവനന്തപുരം: പ്രളയാനന്തരകേരളത്തിന്റെ പുനര്നിര്മ്മാണത്തില് ലാറിബേക്കറുടെ ആശയങ്ങള്ക്ക് ഏറെ പ്രാധാന്യമുണ്ടെന്ന് റവന്യൂ ഭവനനിര്മ്മാണവകുപ്പ് മന്ത്രി ഇ. ചന്ദ്രശേഖരന്. തിരുവനന്തപുരം കനകക്കുന്ന് കൊട്ടാരത്തില് ലാറിബേക്കര് സ്മൃതി സമാപനസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഭാവി കേരളത്തെ മുന്നില്ക്കണ്ട് നിര്മ്മിതികള് നടത്തിയ തീക്ഷ്ണശാലിയായിരുന്നു ലാറിബേക്കര്. കേരളത്തിന്റെ പ്രകൃതിയ്ക്കും കാലാവസ്ഥയ്ക്കും ഇണങ്ങുന്നതും സാധാരണ കുടുംബത്തിന്റെ സാമ്പത്തിക സ്ഥിതിയ്ക്ക് യോജിക്കുന്നതുമായ വീടുകളാണ് അദ്ദേഹം രൂപകല്പന ചെയ്തത്. കേരളത്തില് പ്രളയസാധ്യതയുണ്ടെന്ന് അന്നേ തിരിച്ചറിഞ്ഞ് പ്രവര്ത്തിച്ച മഹാനാണ് അദ്ദേഹമെന്നും മന്ത്രി പറഞ്ഞു. പുനര്നിര്മ്മാണത്തില് നമുക്കുണ്ടാകേണ്ട പാഠം അദ്ദേഹം അന്നേ തയ്യാറാക്കിയിരുന്നു. 1970 കളില് കേരളം കണ്ട മഹത് വ്യക്തികളില് ഒരാളാണ് ലാറിബേക്കര്. അദ്ദേഹം മുന്നോട്ട് വച്ച ആശയങ്ങള് അവലംബമാക്കി ഭവനസാക്ഷരത കേരള ജനതയ്ക്ക് ഉണ്ടാകേണ്ടത് ആവശ്യമാണെന്നും മന്ത്രി പറഞ്ഞു.
ചടങ്ങില് ആര്കിടെക്ട് ഡോ. ജി.ശങ്കര് മുഖ്യപ്രഭാഷണം നടത്തി. സംസ്ഥാന ഭവനനിര്മ്മാണ ബോര്ഡ് ചെയര്മാന് പി. പ്രസാദ്, ഡോ. മൃദുല് ഈപ്പന്, ബി. അബ്ദുള് നാസര്, ഡോ. റൂബി എബ്രഹാം തുടങ്ങിയവര് സംസാരിച്ചു.
ലാറിബേക്കറുടെ ജ•-ദിനത്തോടനുബന്ധിച്ച് സംസ്ഥാന ഭവനനിര്മ്മാണ വകുപ്പ്, സംസ്ഥാന നിര്മ്മിതി കേന്ദ്രം, ലാറിബേക്കര് ഇന്റര്നാഷണല് സ്കൂള് ഓഫ് ഹാബിറ്റാറ്റ് സ്റ്റഡീസ് എന്നിവയുടെ ആഭിമുഖ്യത്തിലാണ് ലാറിബേക്കര് സ്മൃതി സംഘടിപ്പിച്ചത്.
Discussion about this post