നെടുങ്കണ്ടം: പീരുമേട് സബ്ജയിലില് പ്രതി രാജ്കുമാര് മരിച്ച സംഭവത്തില് നെടുങ്കണ്ടം എസ്ഐയായിരുന്ന കെ.എ. സാബു, സിവില് പോലീസ് ഉദ്യോഗസ്ഥന് സജീവ് ആന്റണി എന്നിവരെ അറസ്റ്റു ചെയ്തു. ചൊവ്വാഴ്ച ക്രൈംബ്രാഞ്ച് കസ്റ്റഡിയിലെടുത്ത ഇവരെ ചോദ്യം ചെയ്യലിനു ശേഷം ബുധനാഴ്ച രാവിലെയാണ് അറസ്റ്റു ചെയ്തത്. കസ്റ്റഡി മര്ദ്ദനത്തിനാണ് അറസ്റ്റ്. പ്രത്യേക അന്വേഷണം സംഘത്തിന്റെ തടലവന് കോട്ടയം ക്രൈംബ്രാഞ്ച് ഡിവൈഎസ്പി സാബുമാത്യുവിന്റെ നേതൃത്വലായിരുന്നു അറസ്റ്റ്. ക്രൈംബ്രാഞ്ച് സംഘത്തിന്റെ അന്വേഷണത്തില് നെടുങ്കണ്ടം പോലീസ് സ്റ്റേഷനില് രാജ്കുമാര് ക്രൂരമായ മര്ദനത്തിനിരയായെന്ന കണ്ടെത്തലിന്റെ അടിസ്ഥാനത്തിലാണ് പോലീസുകാരെ അറസ്റ്റു ചെയ്തത്. അന്വേഷണത്തിന്റെ പ്രാഥമിക ഘട്ടത്തില് ഇരുവര്ക്കുമെതിരെ വകുപ്പ് തല നടപടി സ്വീകരിച്ചിരുന്നു. തൂക്കുപാലം കേന്ദ്രമായി പ്രവര്ത്തിച്ചിരുന്ന ഹരിത ഫിനാന്സ് തട്ടിപ്പുമായി ബന്ധപ്പെട്ടാണ് രാജ്കുമാറിനെ പോലീസ് കസ്റ്റഡിയിലെടുത്തത്. ജൂണ് 12നു വീട്ടില് നിന്നും കസ്റ്റഡിയിലെടുത്ത രാജ്കുമാറിനെ നാലു ദിവസം കസ്റ്റഡിയില് സൂക്ഷിച്ച് മര്ദനത്തിനു വിധേയനാക്കുകയായിരുന്നു. പിന്നീട് പീരുമേട് സബ്ജയിലില് റിമാന്ഡില് കഴിയവേ ജൂണ് 21നാണ് രാജ്കുമാര് മരണപ്പെട്ടത്. കോട്ടയം മെഡിക്കല് കോളജില് നടത്തിയ പോസ്റ്റുമോര്ട്ടത്തിലാണ് നെടുങ്കണ്ടം പോലീസ് സ്റ്റേഷനില് ഉരുട്ടല് ഉള്പ്പെടെയുള്ള മര്ദനമുറകള്ക്ക് രാജ്കുമാര് വിധേയനായെന്നു വ്യക്തമായത്. ഇയാളുടെ ഇരുകാലുകളുടെയും മുട്ടിനുതാഴെ 32 മുറിവുകള് കാണപ്പെട്ടിരുന്നു. കാല്വെള്ള തകര്ന്ന നിലയിലായിരുന്നു. ഇടതുകാലിന്റെയും കാല്വിരലുകളുടെയും അസ്ഥികള് പൊട്ടിയിരുന്നു. രണ്ടു കാലുകളുടെയും തുടയിലെ പേശികള് വിട്ടുമാറിയിരുന്നതായും പോസ്റ്റുമോര്ട്ടം റിപ്പോര്ട്ടില് പറയുന്നു. സംഭവത്തില് എസ്ഐ കെ.എ. സാബു, എഎസ്ഐ സി.ബി. റെജിമോന്, ഡ്രൈവര്മാരായ നിയാസ്, സജീവ് ആന്റണി എന്നിവരെ അന്വേഷണ വിധേയമായി സസ്പെന്ഡു ചെയ്തതിരുന്നു. നെടുങ്കണ്ടം എച്ച്എസ്ഒ റെജി എം. കുന്നിപ്പറന്പില്, സിവില് പോലീസ് ഉദ്യോഗസ്ഥരായ ബിജു ലൂക്കോസ്, ജോഷി, രാജേഷ്, ഗീതു ഗോപിനാഥ് എന്നിവരെ സ്ഥലംമാറ്റുകയും ചെയ്തിരുന്നു.
രാജ്കുമാര് കസ്റ്റഡി മരണം: എസ്ഐ ഉള്പ്പെടെ രണ്ടു പോലീസുകാരെ അറസ്റ്റു ചെയ്തു
പുതിയ വാർത്തകൾ
Discussion about this post