തിരുവനന്തപുരം: പ്രധാനമന്ത്രി നരേന്ദ്രമോദിയെ അനുകൂലിച്ച് നടത്തിയ പ്രസ്താവനയില് ശശി തരൂര് എംപിയ്ക്കെതിരെ നടപടിയില്ല. വിഷയം വിവാദമായതിനേത്തുടര്ന്ന് തരൂര് നല്കിയ വിശദീകരണം പരിശോധിച്ച ശേഷമാണ് കെപിസിസി ഇത്തരമൊരു നിര്ദേശം നല്കിയത്. ഇതുമായി ബന്ധപ്പെട്ട വിവാദങ്ങള് അവസാനിപ്പിക്കണമെന്നും പാര്ട്ടി നേതൃത്വം നേതാക്കള്ക്ക് നിര്ദേശം നല്കി. തന്നെ ഒരു മോദി സ്തുതിപാഠകനായി ചിത്രീകരിക്കുകയാണ് ചിലര് ചെയ്യുന്നതെന്ന് തരൂര് വിശദീകരണത്തില് വ്യക്തമാക്കിയിരുന്നു. മോദിയെ താന് സ്തുതിച്ചിട്ടില്ലെന്നും മോദി ചെയ്ത നല്ല കാര്യങ്ങളെ നല്ലത് എന്ന് പറയുക മാത്രമാണ് താന് ചെയ്തതെന്ന് അദ്ദേഹം വ്യക്തമാക്കിയിരുന്നു. അങ്ങനെ ചെയ്തെങ്കില് മാത്രമേ അദ്ദേഹത്തെ വിമര്ശിക്കാനുമാകൂ എന്നും പ്രധാനമന്ത്രിയെ താന് വിമര്ശിച്ചതിന്റെ പത്തുശതമാനം പോലും കേരള നേതാക്കള് ആരും വിമര്ശിച്ചിട്ടില്ലെന്നും തരൂര് വിശദീകരണത്തില് ചൂണ്ടിക്കാട്ടിയിരുന്നു. കെപിസിസി അധ്യക്ഷന് മുല്ലപ്പള്ളി രാമചന്ദ്രന് തനിക്ക് അയച്ച മെയില് ചോര്ന്നതിലെ അതൃപ്തിയും തരൂര് പ്രകടിപ്പിച്ചിരുന്നു. നേരത്തെ, തരൂരിന്റെ നിലപാടിനെ വിമര്ശിച്ച് പ്രതിപക്ഷ നേതാവ് രമേശ് ചെന്നിത്തല, കെപിസിസി അധ്യക്ഷന് മുല്ലപ്പള്ളി രാമചന്ദ്രന്, യുഡിഎഫ് കണ്വീനര് ബെന്നി ബെഹനാന് തുടങ്ങി നിരവധി കോണ്ഗ്രസ് നേതാക്കള് തരൂരിനെതിരെ രൂക്ഷ വിമര്ശനങ്ങളുമായി രംഗത്തെത്തിയിരുന്നു.
മോദി ചെയ്ത നല്ല കാര്യങ്ങളെ നല്ലത് എന്ന് പറയുക മാത്രമാണ് താന് ചെയ്തത്: ശശി തരൂര്
പുതിയ വാർത്തകൾ
Discussion about this post