തിരുവനന്തപുരം: ആരോഗ്യമേഖലയില് മിക്ക കാര്യങ്ങളിലും കേരളം മുന്നിലാണെങ്കിലും നവജാതശിശുക്കളുടെ ഭാരം കുറയുന്നത് ഗൗരവമായി കാണണമെന്ന് മുഖ്യമന്ത്രി പിണറായി വിജയന് പറഞ്ഞു. ഇക്കാര്യത്തില് തൊട്ടുകിടക്കുന്ന സംസ്ഥാനത്തേക്കാള് നാം പിറകിലാണ്. ഗര്ഭിണികളുടെ പോഷകാഹാരക്കുറവാണ് ഇതു കാണിക്കുന്നതെന്നും മുഖ്യമന്ത്രി പറഞ്ഞു. സ്ത്രീകളിലേയും കുട്ടികളിലേയും പോഷകക്കുറവ് പരിഹരിക്കാനായി പോഷണ് അഭിയാന്റെ ഭാഗമായി സംസ്ഥാന വനിതാ ശിശുവികസന വകുപ്പ് ആവിഷ്കരിച്ച സമ്പുഷ്ട കേരളം പദ്ധതിയുടെ സംസ്ഥാനതല ഉദ്ഘാടനവും അങ്കണവാടികള്ക്കുള്ള മൊബൈല് വിതരണവും ഐ.സി.ഡി.എസ്.-സി.എ.എസ്. സോഫ്റ്റുവെയര് ഉദ്ഘാടനവും നിര്വഹിക്കുക യായിരുന്നു മുഖ്യമന്ത്രി.
ജവഹര് സഹകരണഭവനില് നടന്ന ചടങ്ങില് ആരോഗ്യ, സാമൂഹ്യനീതി, വനിത ശിശുവികസന വകുപ്പ് മന്ത്രി കെ.കെ. ശൈലജ ചടങ്ങില് അധ്യക്ഷത വഹിച്ചു. ആരോഗ്യമേഖലയില് കുറെക്കൂടി മെച്ചപ്പെട്ട സൂചികകള് ഉണ്ടാക്കുന്നതിനാണ് സര്ക്കാര് ശ്രമിക്കുന്നതെന്ന് മന്ത്രി പറഞ്ഞു. ആവശ്യമായ പോഷകങ്ങള് സ്ത്രീകളിലും കുട്ടികളിലും എത്തുന്നില്ല എന്നതാണ് രാജ്യത്തെ സ്ഥിതി. കേരളത്തിന്റെ തനതായ പ്രത്യേകതകള് കൂട്ടിച്ചേര്ത്താണ് പോഷണ് അഭിയാന് പദ്ധതി നടപ്പാക്കുന്നതെന്നും മന്ത്രി പറഞ്ഞു.
കേന്ദ്ര വനിത, ശിശുവികസന വകുപ്പ് മന്ത്രി സ്മൃതി ഇറാനി മുഖ്യാതിഥിയായി. പോഷകാഹാരക്കുറവ് എന്ന ഭീഷണിയോട് കേന്ദ്രവും സംസ്ഥാനങ്ങളും ചേര്ന്നു പോരാടണമെന്ന് സ്മൃതി ഇറാനി പറഞ്ഞു. പത്തുകോടി പേരെ പോഷണ് അഭിയാന് പദ്ധതിയില് ഉള്ക്കൊള്ളിക്കുകയാണ് ലക്ഷ്യമെന്നും കേന്ദ്രമന്ത്രി പറഞ്ഞു.
കുട്ടികളുടെ പോഷകനിലവാരം ഉറപ്പുവരുത്തുന്നതിന് നല്കുന്ന ഫോര്ട്ടിഫൈഡ് ന്യൂട്രിമിക്സ് വിതരണോദ്ഘാടനവും സമ്പുഷ്ടികരിച്ച മില്മ പാലിന്റെ വിതരണോദ്ഘാടനവും തദ്ദേശസ്വയംഭരണമന്ത്രി എ.സി.മൊയ്തീന് നിര്വഹിച്ചു. വനിതാ, ശിശു ആരോഗ്യത്തില് രാജ്യത്ത് മുന്പേ നടക്കുന്ന സംസ്ഥാനമായി കേരളം മാറിയിട്ടുണ്ടെന്ന് മന്ത്രി പറഞ്ഞു.
Discussion about this post