ആലുവ: 165-ാമത് ശ്രീനാരായണ ഗുരുദേവ ജയന്തിയോടനുബന്ധിച്ച് എസ്.എന്‍.ഡി.പി യോഗം ആലുവ യൂണിയന്‍ സംഘടിപ്പിച്ച ജയന്തി മഹാഘോഷയാത്ര ആലുവ നഗരത്തെ പീതസാഗരമാക്കി. അദ്വൈതാശ്രമത്തിന്റെയും ഇതര ശ്രീനാരായണീയ പ്രസ്ഥാനങ്ങളുടെയും സഹകരണത്തോടെ സംഘടിപ്പിച്ച ജയന്തി മഹാഘോഷയാത്രയില്‍ ആലുവ യൂണിയന്‍ പരിധിയിലെ 61 ശാഖകളില്‍ നിന്നായി ആയിരക്കണക്കിന് ശ്രീനാരായണീയരാണ് പങ്കെടുത്തത്. ഘോഷയാത്ര വിളംബര ചെയ്യുന്ന പൈലറ്റ് വാഹനത്തിന് പിന്നാലെ ശ്രീനാരായണ ഗുരുദേവ വിഗ്രഹം വഹിച്ചുള്ള രഥവും അതിന് പിന്നില്‍ എസ്.എന്‍.ഡി.പി യോഗം യൂണിയന്‍ നേതാക്കളും ജയന്തിയാഘോഷ കമ്മിറ്റി ഭാരവാഹികളും അണിനിരന്നു. തുടര്‍ന്ന് 218 ാം നമ്പര്‍ എടയപ്പുറം ശാഖയാണ് അണിനിരന്നത്. അവസാന കണ്ണിയായി 2583 -ാം നമ്പര്‍ അത്താണി ശാഖയും അണിനിരന്നു.
പ്രളയം, ഉരുള്‍പൊട്ടല്‍, മാലിന്യമുക്ത കേരളം തുടങ്ങി ആനുകാലിക സംഭവങ്ങള്‍ ആശയമാക്കിയുള്ള നിശ്ചല ദൃശ്യങ്ങള്‍, പ്രശ്ചനവേഷങ്ങള്‍, തെയ്യം, ചെണ്ടമേളം, കാവടി, പഞ്ചവാദ്യം തുടങ്ങിയ വാദ്യമേളങ്ങള്‍, പൂത്താലമേന്തിയ സ്ത്രീകള്‍, കേരളീയ വേഷം ധരിച്ച സ്ത്രീകള്‍, വെള്ള മുണ്ടും ഷര്‍ട്ടും ധരിച്ച പുരുഷന്മാര്‍ എന്നിവ ഘോഷയാത്രയെ ആകര്‍ഷകമാക്കി.
അദ്വൈതാശ്രമ കവാടത്തില്‍ എസ്.എന്‍.ഡി.പി യോഗം പ്രസിഡന്റ് ഡോ. എം.എന്‍. സോമന്‍ യൂണിയന്‍ പ്രസിഡന്റ് വി. സന്തോഷ്ബാബുവിന് പീതപതാക കൈമാറി ഘോഷയാത്ര ഫ്ളാഗ് ഓഫ് ചെയ്തു. അന്‍വര്‍ സാദത്ത് എം.എല്‍.എ, ജി.സി.ഡി.എ ചെയര്‍മാന്‍ വി. സലീം എന്നിവര്‍ ഘോഷയാത്രയെ അനുദാവനം ചെയ്തു. യോഗം അസി. സെക്രട്ടറി കെ.എസ്. സ്വാമിനാഥന്‍, യൂണിയന്‍ സെക്രട്ടറി എ.എന്‍. രാമചന്ദ്രന്‍, വൈസ് പ്രസിഡന്റ് പി.ആര്‍. നിര്‍മ്മല്‍കുമാര്‍, ബോര്‍ഡ് മെമ്പര്‍മാരായ വി.ഡി. രാജന്‍, ടി.എസ്. അരുണ്‍, പി.പി. സനകന്‍, കൗണ്‍സിലര്‍മാരായ കെ.കെ. മോഹനന്‍, കെ. കുമാരന്‍, സജീവന്‍ ഇടച്ചിറ, രൂപേഷ് മാധവന്‍, കെ.ബി. അനില്‍കുമാര്‍, വി.എ. ചന്ദ്രന്‍, കെ.സി. സ്മിജന്‍, വനിത സംഘം പ്രസിഡന്റ് ലത ഗോപാലകൃഷ്ണന്‍, സെക്രട്ടറി ബിന്ദു രതീഷ്, വൈസ് പ്രസിഡന്റ് ഷിജി രാജേഷ്, യൂത്ത് മൂവ്‌മെന്റ് പ്രസിഡന്റ് അമ്പാടി ചെങ്ങമനാട്, സെക്രട്ടറി അനിത്ത് മുപ്പത്തടം, വൈസ് പ്രസിഡന്റ് നിബിന്‍ നൊച്ചിമ, ജോ.സെക്രട്ടറി അഖില്‍, അദ്വൈതാശ്രമം ഭക്തജന സമിതി കണ്‍വീനര്‍ എം.വി. മനോഹരന്‍ എന്നിവര്‍ നേതൃത്വം നല്‍കി. ടൗണ്‍ ഹാള്‍, പമ്പ് കവല, റെയില്‍വേ, കെ.എസ്.ആര്‍.ടി.സി, ഗവ. ആശുപത്രി, കാരോത്തുകുഴി, സ്വകാര്യ ബസ് സ്റ്റാന്റ് ബാങ്ക് കവല വഴി തിരികെ ഘോഷയാത്ര അദ്വൈതാശ്രമത്തില്‍ സമാപിച്ചു.
Discussion about this post