തിരുവനന്തപുരം: കൃഷിവകുപ്പില് കെട്ടിക്കിടക്കുന്ന ഫയലുകള് തീര്പ്പാക്കുന്നതിന് ഒക്ടോബര് രണ്ടിന് ഫയല് അദാലത്ത് നടത്തുമെന്ന് കൃഷിമന്ത്രി അഡ്വ.വി.എസ്.സുനില്കുമാര് പറഞ്ഞു. രാവിലെ മുതല് ഉച്ചവരെ സെക്രട്ടേറിയറ്റ് തലത്തിലും ഉച്ചതിരിഞ്ഞ് കൃഷിവകുപ്പ് ഡയറക്ടറേറ്റിലുമായിരിക്കും ഫയല് അദാലത്ത്.
രാവിലെ 10.30 മുതല് ഒരുമണി വരെ ഫിസിക്കല് ഫയലുകളും 2.15 മുതല് അഞ്ച് വരെ ഇ-ഫയലുകളും കൃഷിമന്ത്രിയുടെ സാന്നിധ്യത്തില് പരിഗണിക്കും. കാര്ഷികോത്പാദന കമ്മിഷണര്, മറ്റ് ഉന്നതോദ്യോഗസ്ഥര് തുടങ്ങിയവരും പങ്കെടുക്കും. ഈ മാസം 31 ന് മുമ്പ് കോടതിനടപടിയും മറ്റുമായി ബന്ധപ്പെട്ടതൊഴികെയുള്ള കെട്ടിക്കിടക്കുന്ന എണ്പത് ശതമാനം ഫയലുകളും തീര്പ്പാക്കുമെന്നും വാര്ത്താസമ്മേളനത്തില് മന്ത്രി അറിയിച്ചു.
ഫയലുകളുടെ കാലപ്പഴക്കം, സ്വഭാവം എന്നിവയ്ക്ക് മുന്ഗണന നല്കിയാവും തീര്പ്പാക്കല്. പെന്ഷന് കേസുകള്, പൊതുജനങ്ങളില്നിന്നും ലഭിക്കുന്ന പരാതികള് എന്നിവയ്ക്കും പ്രത്യേകപ്രാധാന്യം നല്കും. മലയാളത്തില് കൈകാര്യം ചെയ്യുന്ന ഫയലുകളുടെ കണക്ക് തീര്പ്പാക്കല് പ്രത്യേകം വിലയിരുത്തും. മുഖ്യമന്ത്രിയുടെ നിര്ദേശപ്രകാരം ആഗസ്റ്റ് മുതല് ഫയല് തീര്പ്പാക്കലിന് തീവ്രയജ്ഞപരിപാടികള് തീര്പ്പാക്കിവരികയാണ്. 2020 മാര്ച്ച് 31നകം വകുപ്പില് പൂര്ണമായും ഇ-ഗവേണന്സ് നടപ്പാക്കുമെന്നും മന്ത്രി പറഞ്ഞു.
Discussion about this post