തിരുവനന്തപുരം : ക്ഷേത്രങ്ങളിലും നൃത്ത – സംഗീത പഠനകേന്ദ്രങ്ങളിലും ഒന്‍പത് ദിവസം നീണ്ടുനില്‍ക്കുന്ന നവരാത്രിപൂജ തുടങ്ങി. വിജയദശമി ദിവസം വിദ്യാരംഭത്തോടെയാണ് ചടങ്ങുകള്‍ അവസാനിക്കുന്നത്. നവരാത്രിപൂജകള്‍ ദര്‍ശിക്കുന്നതിനായി ക്ഷേത്രങ്ങളില്‍ വന്‍ഭക്തജനത്തിരക്കാണ് അനുഭവപ്പെടുന്നത്.
വെള്ളായണി ദേവീക്ഷേത്രം, ആറ്റുകാല്‍ ഭഗവതി ക്ഷേത്രം, കരിക്കം ശ്രീ ചാമുണ്ഡിദേവീ ക്ഷേത്രം, പൂജപ്പുര സരസ്വതി ക്ഷേത്രം, കോട്ടയ്ക്കകം അഭേദാശ്രമം മഹാമന്ത്രാലയം, തച്ചപ്പള്ളി ഊരൂട്ടുമണ്ഡപ ദേവിക്ഷേത്രം, ചെല്ലമംഗലം ദേവിക്ഷേത്രം, ചിന്മയ മിഷന്‍, കാര്യവട്ടം വിയ്യാറ്റ് ചാമുണ്ഡേശ്വരി സരസ്വതി ഗണപതി ക്ഷേത്രം, അറപ്പുര ഈശ്വരി അമ്മന്‍ സരസ്വതി ദേവി ക്ഷേത്രം, ശ്രീവരാഹം മുക്കോലയ്ക്കല്‍ ഭഗവതി ക്ഷേത്രം, കൊഞ്ചിറവിള ഭഗവതി ക്ഷേത്രം, പുത്തന്‍ചന്ത ഗാന്ധാരിഅമ്മന്‍ കോവില്‍ എന്നിവിടങ്ങളില്‍ നവരാത്രി പൂജയും സംഗീതോത്സവവും തുടങ്ങി. ചില ക്ഷേത്രങ്ങളില്‍ ദേവീഭാഗവത നവാഹയജ്ഞവും നടക്കുന്നുണ്ട്.
ഒന്‍പത് രാത്രിയും പത്ത് പകലും നീണ്ടുനില്‍ക്കുന്ന ഉത്സവത്തില്‍ ആദിപരാശക്തിയുടെ ഒന്‍പത് രൂപങ്ങളെയാണ് ആരാധിക്കുന്നത്. നവരാത്രിയിലെ ആദ്യത്തെ മൂന്ന് ദിവസം ഭഗവതിയെ പാര്‍വതിയായും അടുത്ത മൂന്ന് ദിവസം ലക്ഷ്മിയായും അവസാനത്തെ മൂന്ന് നാള്‍ സരസ്വതിയായും സങ്കല്‍പ്പിച്ച് പൂജ നടത്തും. ദുര്‍ഗാഷ്ടമി നാളില്‍ ദുര്‍ഗയായും, മഹാനവമി ദിനത്തില്‍ മഹാലക്ഷ്മിയായും, വിജയദശമിയില്‍ സരസ്വതിയായും ആരാധിക്കാറുണ്ട്.
Discussion about this post