തിരുവനന്തപുരം: ഐഎസ്ആര്ഒ ചാരക്കേസില് നിയമവിരുദ്ധമായി പ്രതിചേര്ക്കപ്പെട്ട ശാസ്ത്രജ്ഞന് നമ്പി നാരായണന് 1.30 കോടി രൂപ നഷ്ടരപരിഹാരം നല്കാന് ശുപാര്ശ. നഷ്ടപരിഹാരം നിശ്ചയിക്കാന് സര്ക്കാര് മധ്യസ്ഥനായി ചുമതലപ്പെടുത്തിയ മുന് ചീഫ് സെക്രട്ടറി കെ.ജയകുമാറാണ് സര്ക്കാരിന് ശുപാര്ശ നല്കിയത്. ജയകുമാര് രണ്ടുതവണ നമ്പി നാരായണനുമായി ചര്ച്ച നടത്തിയിരുന്നു.
ഒരു കോടി രൂപ നഷ്ടപരിഹാരം വേണമെന്ന് ആവശ്യപ്പെട്ട സര്ക്കാരിനെതിരെ 20 വര്ഷം മുമ്പ് നമ്പി നാരായണന് കേസ് നല്കിയിരുന്നു. ഈ സാഹചര്യത്തിലാണ് നമ്പി നാരായണനുമായി ചര്ച്ച ചെയ്ത് നഷ്ടപരിഹാരം നിശ്ചയിക്കാന് കെ.ജയകുമാറിനെ സര്ക്കാര് നിയോഗിച്ചത്. റിപ്പോര്ട്ട് നിയമോപദേശത്തിനായി അഡ്വക്കേറ്റ് ജനറല് സി.പി സുധാകര പ്രസാദിന് കൈമാറി. കേസില്പ്പെട്ടതിനെ തുടര്ന്ന് നമ്പി നാരായണനും രാജ്യത്തിനും നഷ്ടപ്പെട്ട അവസരങ്ങളുടെ മൂല്യം കണക്കാക്കാനാവില്ലെന്നും റിപ്പോര്ട്ടില് സൂചിപ്പിക്കുന്നു. ഇത്രയുംകാലം നീതി വൈകിയതു കൂടി കണക്കിലെടുത്താണ് നഷ്ടപരിഹാരം 1.30 കോടിയായി നിശ്ചയിച്ചത്. ഈ തുക നമ്പിനാരായണന് സ്വീകാര്യമാകുമെന്നും ജയകുമാറിന്റെ റിപ്പോര്ട്ടില് പരമാര്ശമുണ്ട്. ഒരുവിഭാഗം മാധ്യമങ്ങളുടെയും അന്വേഷണ ഉദ്യോഗസ്ഥരുടെയും വേട്ടയാടലിന് ഇരയായ നമ്പി നാരായണന് 50 ലക്ഷം രൂപ നഷ്ടപരിഹാരം നല്കാന് സുപ്രീംകോടതി നേരത്തെ വിധിച്ചിരുന്നതാണ്.
Discussion about this post