തിരുവനന്തപുരം: ശ്രീപദ്മനാഭസ്വാമി ക്ഷേത്രത്തില്‍ അല്പശി ഉത്സവത്തിന് 26ന് കൊടിയേറും. ഉത്സവത്തിനു മുന്നോടിയായി മുളയീട് പൂജയ്ക്കുള്ള മണ്ണുനീര്‍ കോരല്‍ ചടങ്ങ് നാളെ വൈകിട്ട് മിത്രാനന്ദപുരം ക്ഷേത്രക്കുളത്തില്‍ നടക്കും. തുടര്‍ന്ന് ഉത്സവ കൊടിയേറ്റിനു തലേന്നു വരെ അടിയന്തരപൂജയും കലശാഭിഷേകവും നടക്കും.
26ന് രാത്രി സിംഹ വാഹനത്തില്‍ വിഗ്രഹം എഴുന്നള്ളിക്കും. ഇതിനു തുടര്‍ച്ചയായി 27 മുതല്‍ നവംബര്‍ 2 വരെ വൈകിട്ടും രാത്രിയിലും വിവിധ വാഹനങ്ങളില്‍ എഴുന്നള്ളിപ്പ് നടക്കും. നവംബര്‍ 3ന് രാത്രിയാണ് പ്രധാന ചടങ്ങായ പള്ളിവേട്ട നടക്കുക. പടിഞ്ഞാറേ നടയില്‍നിന്ന് ആരംഭിക്കുന്ന പള്ളിവേട്ട ഘോഷയാത്രയ്ക്ക് ഉടവാളേന്തിയ രാജകുടുംബാംഗം നേതൃത്വം നല്‍കും. നായര്‍ പടയാളികള്‍, തീവെട്ടി, കുതിരപ്പട, നെറ്റിപ്പട്ടം കെട്ടിയ ആന എന്നിവ ഘോഷയാത്രയില്‍ ഉണ്ടായിരിക്കും. ഗരുഡ വാഹനങ്ങളില്‍ പദ്മനാഭസ്വാമി, ശ്രീകൃഷ്ണസ്വാമി, നരസിംഹസ്വാമി വിഗ്രഹങ്ങളും ഘോഷയാത്രയെ അനുഗമിക്കും.
സുന്ദരവിലാസം കൊട്ടാരത്തിനു മുന്നില്‍ പ്രത്യേകം സജ്ജീകരിച്ച വേട്ടക്കളത്തിനു മുന്നില്‍ ഘോഷയാത്രയെത്തിയ ശേഷം പള്ളിവേട്ട നടക്കും.
പിറ്റേന്ന് വൈകിട്ട് ആറാട്ട് നടക്കും. 5ന് ആറാട്ട് കലശത്തോടെ അല്പശി ഉത്സവത്തിന് സമാപനമാകും.
Discussion about this post