തിരുവനന്തപുരം: സിസ്റ്റര് അഭയ പീഡനത്തിനിരയായിട്ടില്ലെന്ന് തിരുവനന്തപുരം ഫോറന്സിക് ലാബിലെ മുന് ഉദ്യോഗസ്ഥരുടെ സാക്ഷിമൊഴി. മുന് കെമിക്കല് എക്സാമിനര് ആര് ഗീതയും അനലിസ്റ്റ് ചിത്രയുമാണ് തിരുവനന്തപുരം സിബിഐ കോടതിയില് മൊഴി നല്കിയത്. അഭയയുടെ ആന്തരിക അവയവങ്ങളുടെ രാസപരിശോധനയില് തെളിവ് കണ്ടെത്തിയില്ലെന്നും ഇവര് കോടതിയില് മൊഴി നല്കി.
സിസ്റ്റര് അഭയയുടെ രാസപരിശോധന റിപ്പോര്ട്ട് തിരുത്തിയ കേസില് സിജെഎം കോടതി നേരത്തെ വെറുതെ വിട്ട ഉദ്യോഗസ്ഥരാണ് മൊഴി നല്കിയ രണ്ട് സാക്ഷികളും. 1992 ഏപ്രില് പത്തിന് തിരുവനന്തപുരം ഫോറന്സിക് ലാബില് കൊല്ലപ്പെട്ട അഭയയുടെ ആന്തരികാവയവങ്ങളുടെ രാസപരിശോധന റിപ്പോര്ട്ടില് തിരുത്തല് വരുത്തിയെന്ന് കാട്ടി ജോമോന് പുത്തന്പുരയ്ക്കലാണ് സിജെഎം കോടതിയില് ഹര്ജി നല്കിയിരുന്നത്.
2009-ല് കുറ്റപത്രം സമര്പ്പിച്ച അഭയ കേസില് പത്ത് വര്ഷത്തിന് ശേഷമാണ് വിചാരണ നടക്കുന്നത്. വിചാരണ തടയണമെന്നാവശ്യപ്പെട്ട് കേസിലെ പ്രതികള് ഹൈക്കോടതിയെ സമീപിച്ചതിനെ തുടര്ന്ന് നടപടികള് നിരന്തരം മാറ്റിവയ്ക്കുകയായിരുന്നു. ഫാ.തോമസ് എം കോട്ടൂര്, സിസ്റ്റര് സെഫി എന്നിവരാണ് കേസിലെ മറ്റ് പ്രതികള്. രണ്ടാം പ്രതി ഫാ ജോസ് പൂതൃക്കയില്, ക്രൈം ബ്രാഞ്ച് മുന് എസ് പി, കെ ടി മൈക്കിള് എന്നിവരെ നേരത്തെ കുറ്റവിമുക്തരാക്കിയിരുന്നു.
Discussion about this post