തിരുവനന്തപുരം: സംസ്ഥാനത്ത് ഗതാഗത നിയമലംഘനങ്ങള്ക്കുള്ള പിഴത്തുക കുറയ്ക്കുന്നതിനായുള്ള ഭേദഗതിക്ക് മന്ത്രിസഭ അംഗീകാരം നല്കി. സീറ്റ് ബെല്റ്റും ഹെല്മറ്റും ധരിക്കാത്തതിന് ഈടാക്കുന്ന പിഴത്തുക പകുതിയാക്കി കുറച്ചു. ആയിരത്തില് നിന്ന് 500 രൂപയാക്കിയാണ് പിഴ കുറച്ചത്. അമിത വേഗത്തിനുള്ള ആദ്യ നിയമ ലംഘനത്തിന് 1500 രൂപയും ആവര്ത്തിച്ചാല് 3000 രൂപയും പിഴ ഒടുക്കേണ്ടിവരും. വാഹനത്തില് അമിതഭാരം കയറ്റലുള്ള പിഴ 20000 രൂപയില് നിന്ന് പതിനായിരമാക്കി കുറച്ചു.
സംസ്ഥാന സര്ക്കാരിന് തീരുമാനമെടുക്കാന് കഴിയുന്ന ഗതാഗത നിയമ ലംഘനങ്ങളിലെ പിഴത്തുക കുറയ്ക്കാനാണ് ഇപ്പോള് തീരുമാനമായത്. ഏതെല്ലാം വിഭാഗങ്ങളില് എത്രത്തോളം പിഴ കുറയ്ക്കാമെന്നത് സംബന്ധിച്ച നിര്ദ്ദേശം സമര്പ്പിക്കാന് ഗതാഗത സെക്രട്ടറിയെ ചുമതലപ്പെടുത്തിയിരുന്നു. അതേസമയം, മദ്യപിച്ച് വാഹനമോടിക്കല്, വാഹനം ഓടിക്കുന്നതിനിടെയുള്ള ഫോണ് ഉപയോഗം തുടങ്ങിയ കുറ്റങ്ങള്ക്ക് പിഴ തുകയില് മാറ്റമുണ്ടാകില്ല.
ഗതാഗത നിയമലംഘനങ്ങള്ക്കുള്ള പിഴ പത്തിരട്ടിയോളം കൂട്ടിയ നിയമഭേദഗതി വന്നയുടന് തന്നെ കേരളം വിജ്ഞാപനം പുറത്തിറക്കിയിരുന്നു. ഉയര്ന്ന പിഴ ഈടാക്കുന്നതില് പ്രതിഷേധം ശക്തമായതോടെ വാഹന പരിശോധന നിര്ത്തിവയ്ക്കുകയും ചെയ്തിരുന്നു. പിഴ കുറയ്ക്കാന് സംസ്ഥാനത്തിന് അധികാരമുണ്ടെന്ന് കേന്ദ്ര ഗതാഗതമന്ത്രി നിതിന് ഗഡ്കരി നേരത്തെ വ്യക്തമാക്കിയിരുന്നു.
Discussion about this post