വട്ടിയൂര്‍ക്കാവില്‍ വി.കെ.പ്രശാന്തിന് ഉജ്ജ്വലവിജയം

തിരുവനന്തപുരം: വട്ടിയൂര്‍ക്കാവ് ഉപതെരഞ്ഞെടുപ്പില്‍ സിപിഎം സ്ഥാനാര്‍ത്ഥി വികെ പ്രശാന്തിന് ഉജ്ജ്വല വിജയം. 14438 വോട്ടിനാണ് ഇദ്ദേഹം വിജയിച്ചത്.

വോട്ട് നില

വി.കെ. പ്രശാന്ത് – 54782
കെ. മോഹന്‍കുമാര്‍ – 40344
എസ്. സുരേഷ് – 27425
നോട്ട – 816
എ. മോഹനകുമാര്‍ – 135
നാഗരാജ് ജി. – 100
മുരുകന്‍ എ. – 91
സുരേഷ് എസ്. – 76
മിത്രന്‍ ജി. – 38

ആകെ 169 ബൂത്തുകളിലെ 140 ബൂത്തുകളില്‍ നിന്നുള്ള വോട്ടെണ്ണിയപ്പോള്‍ 46067 വോട്ടാണ് വികെ പ്രശാന്തിന് ലഭിച്ചത്. യുഡിഎഫ് സ്ഥാനാര്‍ത്ഥി ഡോ കെ മോഹന്‍കുമാറിന് 33720 വോട്ട് ലഭിച്ചു. ബിജെപി സ്ഥാനാര്‍ത്ഥി അഡ്വ എസ് സുരേഷിന് ആകെ 24490 വോട്ട് ലഭിച്ചു. കഴിഞ്ഞ അസംബ്ലി തെരഞ്ഞെടുപ്പില്‍ മൂന്നാം സ്ഥാനത്തായിരുന്ന സിപിഎം ഇക്കുറി പ്രശാന്തിലൂടെ ഒന്നാം സ്ഥാനത്തെത്തി.

രണ്ടാം സ്ഥാനത്തായിരുന്ന ബിജെപിക്ക് മൂന്നാം സ്ഥാനം കൊണ്ട് തൃപ്തിപ്പെടേണ്ടി വന്നു. കോണ്‍ഗ്രസ് സ്ഥാനാര്‍ത്ഥി ഡോ കെ മോഹന്‍കുമാര്‍ പരാജയം വോട്ടെണ്ണലിന്റെ ആദ്യസൂചനകള്‍ പുറത്തുവന്നപ്പോള്‍ തന്നെ ഏറെക്കുറെ സ്ഥിരീകരിച്ചിരുന്നു.

മണ്ഡലം രൂപീകരിച്ച ശേഷം 2011 ല്‍ നടന്ന തെരഞ്ഞെടുപ്പില്‍ കെ.മുരളീധരനാണ് ഇവിടെ വിജയിച്ചത്. ഇടതുമുന്നണി സ്വതന്ത്ര സ്ഥാനാര്‍ത്ഥി ചെറിയാന്‍ ഫിലിപ്പിനെ 16000 ത്തോളം വോട്ടിന് പരാജയപ്പെടുത്തിയായിരുന്നു ഇദ്ദേഹം ജയിച്ചത്. എന്നാല്‍ 2016 ല്‍ ബിജെപി കുമ്മനം രാജശേഖരനെ സ്ഥാനാര്‍ത്ഥിയാക്കിയതോടെ മത്സരം കടുത്തു. മൂന്നാം സ്ഥാനത്തായിരുന്ന ബിജെപി ഇതോടെ രണ്ടാം സ്ഥാനത്തേക്ക് വന്നു. അയ്യായിരം വോട്ട് ഭൂരിപക്ഷത്തില്‍ കെ മുരളീധരന്‍ വിജയിക്കുകയായിരുന്നു.

എന്നാല്‍ 2019 ല്‍ എത്തിയപ്പോള്‍ മൂന്നാം സ്ഥാനത്ത് നിന്ന് ഒന്നാം സ്ഥാനത്തേക്ക് എത്താന്‍ മേയര്‍ എന്ന നിലയില്‍ വികെ പ്രശാന്തിന്റെ പ്രതിച്ഛായ വളരെയേറെ ഗുണം ചെയ്തു.

ഡിവൈഎഫ്‌ഐ ജില്ലാ സെക്രട്ടേറിയേറ്റംഗം, സിപിഎം കഴക്കൂട്ടം ഏരിയ കമ്മിറ്റിയംഗം എന്നീ നിലകളില്‍ പ്രവര്‍ത്തിക്കുന്നതിനിടെയാണ് മേയര്‍ സ്ഥാനം വികെ പ്രശാന്തിനെ തേടിയെത്തിയത്.