ഉപതെരഞ്ഞെടുപ്പ്: സംസ്ഥാനത്ത് യു.ഡി.എഫിനു മൂന്നും എല്‍.ഡി.എഫിനു രണ്ടും സീറ്റുകള്‍

തിരുവനന്തപുരം: സംസ്ഥാനത്ത് അഞ്ചു നിയമസഭാമണ്ഡലങ്ങളില്‍ നടന്ന ഉപതെരഞ്ഞെടുപ്പില്‍ യു.ഡി.എഫ് മൂന്നും എല്‍.ഡി.എഫ് രണ്ടും സീറ്റുകള്‍ നേടി. എല്‍.ഡി.എഫിന്റെ ഉറച്ച മണ്ഡലമായ അരൂര്‍ കോണ്‍ഗ്രസിനെ തുണച്ചത് ഇടതുപക്ഷത്തെ ശരിക്കും ഞെട്ടിച്ചു. കോണ്‍ഗ്രസിന്റെ സിറ്റിംഗ് സീറ്റുകളായ വട്ടിയൂര്‍ക്കാവും കോന്നിയും ഇത്തവണ എല്‍.ഡി.എഫിനെയാണ് തുണച്ചത്. എന്‍.എസ്.എസിന്റെ ശക്തമായ പിന്തുണയാണ് ഈ രണ്ടു മണ്ഡലങ്ങളിലും കോണ്‍ഗ്രസിനുണ്ടായിരുന്നത്. വലിയ തോതിലുള്ള വോട്ടുചോര്‍ച്ചയാണ് ഇത്തവണ ബി.ജെ.പിക്കുണ്ടായത്. മഞ്ചേശ്വരത്ത് രണ്ടാം സ്ഥാനത്തെത്താനായതാണ് ഏക ആശ്വാസം.

വട്ടിയൂര്‍ക്കാവില്‍ തിരുവനന്തപുരം കോര്‍പ്പറേഷന്‍ മേയര്‍കൂടിയായ സി.പി.എം സ്ഥാനാര്‍ത്ഥി വി.കെ പ്രശാന്ത് 14,465 വോട്ടുകള്‍ക്കാണ് വിജയിച്ചത്. പ്രശാന്തിന് 54,830 വോട്ടും, കോണ്‍ഗ്രസിലെ കെ. മോഹന്‍കുമാറിന് 40,365 വോട്ടും, ബി.ജെ.പി സ്ഥാനാര്‍ത്ഥി എസ്. സുരേഷിന് 27,453 വോട്ടുകളുമാണ് ലഭിച്ചത്.

അരൂരില്‍ കോണ്‍ഗ്രസിന് അഭിമാനിക്കാവുന്ന വിജയമാണ് ഇക്കുറി. 69,356 വോട്ടുകള്‍ നേടിയ ഷാനിമോള്‍ ഉസ്മാന്‍ 2,079 വോട്ടുകള്‍ക്കാണ് അടൂര്‍ പിടിച്ചടക്കി കേരളത്തെ ഞെട്ടിച്ചത്. എല്‍.ഡി.എഫ് സ്ഥാനാര്‍ത്ഥി മനു സി. പുളിക്കലിന് 67,277 വോട്ടുകളാണ് ലഭിച്ചത്. ബി.ജെ. പി സ്ഥാനാര്‍ത്ഥി കെ.പി. പ്രകാശ് ബാബുവിന് 16,289 വോട്ടുകള്‍ മാത്രമാണ് നേടാനായത്.

കോന്നിയില്‍ എല്‍.ഡി.എഫ് സ്ഥാനാര്‍ത്ഥി കെ.യു. ജനേഷ് കുമാര്‍ 9,953 വോട്ടുകള്‍ക്ക് എതിര്‍സ്ഥാനാര്‍ത്ഥിയായ കോണ്‍ഗ്രസിലെ പി. മോഹന്‍രാജിനെ പരാജയപ്പെടുത്തി. ഇവിടെ കെ.യു. ജനേഷ് കുമാറിന് 54,099 വോട്ടുകളും മോഹന്‍രാജിന് 44,146 വോട്ടുകളും ബി.ജെ.പി സ്ഥാനാര്‍ത്ഥി കെ. സുരേന്ദ്രന് 39,786 വോട്ടുകളും ലഭിച്ചു. ശബരിമല വിഷയം ഏറ്റവും കൂടുതല്‍ പ്രചാരണവിഷയമായതും ബി.ജെ.പി വിജയം ഉറപ്പിച്ചിരുന്നതുമായ സീറ്റായിരുന്നു കോന്നി.

എറണാകുളത്ത് കോണ്‍ഗ്രസ് സീറ്റ് നിലനിര്‍ത്തിയെങ്കിലും കഴിഞ്ഞതവണത്തെക്കാള്‍ ഭൂരിപക്ഷം കുറഞ്ഞത് വിജയത്തിന്റെ തിളക്കം കുറച്ചു. കോണ്‍ഗ്രസ് സ്ഥാനാര്‍ത്ഥി ടി.ജെ. വിനോദ് 37,891 വോട്ടുകളാണ് ലഭിച്ചത്. ഭൂരിപക്ഷം 3,750. എതിര്‍സ്ഥാനാര്‍ത്ഥി ഇടതുപക്ഷസ്വതന്ത്രസ്ഥാനാര്‍ത്ഥി മനുറോയി 34,141 വോട്ടുകളും എന്‍.ഡി.എ സ്ഥാനാര്‍ത്ഥി സി.ജി. രാജഗോപാര്‍ 13,351 വോട്ടുകളും നേടി.

ശക്തമായ ത്രികോണ മത്സരം നടന്ന മഞ്ചേശ്വരത്ത് യു.ഡി.എഫ് സ്ഥാനാര്‍ത്ഥി മുസ്ലീംലീഗിലെ എം.സി. കമറുദ്ദീന്‍ 7,923 വോട്ടുകള്‍ക്കാണ് വിജയിച്ചത്. കമറുദ്ദീന് 65,407 വോട്ടുകള്‍ ലഭിച്ചു. ബി.ജെ.പി ഇവിടെ രണ്ടാം സ്ഥാനത്തെത്തി. രവീശ തന്ത്രി കുണ്ടാര്‍ 57,484 വോട്ടുകള്‍ നേടി. മൂന്നാം സ്ഥാനത്തെത്തിയ സി.പി.എം സ്ഥാനാര്‍ത്ഥി എം. ശങ്കര്‍ റായ്ക്ക് 38,233 വോട്ടുകള്‍ മാത്രമാണ് ലഭിച്ചത്.