തിരുവനന്തപുരം: തലസ്ഥാനത്തെ പ്രധാന ടൂറിസ്റ്റ് കേന്ദ്രമായ ആക്കുളം ടൂറിസ്റ്റ് വില്ലേജിന് മോടി കൂട്ടാന് വിമാനമാതൃകയിലുള്ള എയര്ഫോഴ്സ് മ്യൂസിയത്തിന്റെ നിര്മാണോദ്ഘാടനം മന്ത്രി കടകംപള്ളി സുരേന്ദ്രന് നിര്വഹിച്ചു.
ആക്കുളം ടൂറിസ്റ്റ് വില്ലേജിനെ അന്താരാഷ്ട്ര നിലവാരത്തിലേക്കുയര്ത്തുന്നതിന്റെ ഭാഗമായാണ് മ്യൂസിയം നിര്മാണമെന്നും വിനോദസഞ്ചാര മേഖലയിലെ ആക്കുളത്തിന്റെ പ്രതാപം വീണ്ടെടുക്കാന് ഈ പദ്ധതി ഉപകരിക്കുമെന്നും മന്ത്രി പറഞ്ഞു. ആക്കുളം കായല് പുനരുജ്ജീവനം കൂടി സാധ്യമാകുന്നതോടെ തലസ്ഥാനത്തെ സുപ്രധാന വിനോദ സഞ്ചാര കേന്ദ്രമായി ആക്കുളം മാറുമെന്നും മന്ത്രി പറഞ്ഞു. രാജ്യത്തിന്റെ അഭിമാനമായ വ്യോമസേനയുടെ സേവനങ്ങളും യുദ്ധോപകരണങ്ങളും ജനങ്ങള്ക്ക് കൂടുതല് പരിചയപ്പെടാനായി ഈ മ്യൂസിയത്തിലൂടെ സാധിക്കും. കെട്ടിടമുള്പ്പെടുന്ന അടിസ്ഥാനസൗകര്യ വികസനമാണ് സര്ക്കാര് സജ്ജീകരിക്കുന്നത്. മ്യൂസിയത്തിനുള്ളിലെ പ്രദര്ശന വസ്തുക്കള് ഉള്പ്പെടുന്ന സാങ്കേതിക സഹായം എയര്ഫോഴ്സിന്റേതാണ്. 99 ലക്ഷം രൂപയോളം ചെലവിട്ടാണ് മ്യൂസിയത്തിന്റെ നിര്മ്മാണം.
എയര്ക്രാഫ്റ്റിന്റെ മാതൃകകള്, യുദ്ധോപകരണങ്ങള് എന്നിവ പ്രദര്ശിപ്പിക്കും. വിനോദ സഞ്ചാരികള്ക്ക് എയര്ക്രാഫ്റ്റ് ഓടിക്കാനുള്ള സജ്ജീകരണവും ചെയ്യും. ടൂറിസ്റ്റ് വില്ലേജിലെ നീന്തല്ക്കുളത്തിനു സമീപത്തെ പഴയ കെട്ടിടമാണ് വിമാന മാതൃകയില് മാറ്റിയെടുക്കുന്നത്. ടൂറിസ്റ്റ് വില്ലേജിന്റെ നവീകരണത്തിനായി 9.34 കോടി രൂപയുടെ ഫണ്ടിന് സര്ക്കാര് അനുമതിയായിട്ടുണ്ട്. മ്യൂസിയത്തിന് സമീപത്ത് യോഗാകേന്ദ്രവും വിപുലപ്പെടുത്തുന്നുണ്ട്.
ശംഖുമുഖത്തെയും വേളിയെയും തമ്മില് ബന്ധിപ്പിക്കുന്ന ഹെലികോപ്റ്റര് സര്വീസും ടൂറിസത്തിന്റെ ഭാഗമായി സജ്ജീകരിക്കുമെന്ന് ചടങ്ങില് മുഖ്യാതിഥിയായ സതേണ് എയര് കമാന്ഡ് എയര്മാര്ഷല് ബി.സുരേഷ് പറഞ്ഞു.
ടൂറിസം ഡയറക്ടര് പി.ബാലകിരണ് അധ്യക്ഷത വഹിച്ചു. ഡെപ്യൂട്ടി കളക്ടര് അനു.എസ്.നായര്, വാര്ഡ് കൗണ്സിലര് വി.ആര്.സിനി, എയര് മാര്ഷല് മാനവേന്ദ്രസിംഗ്, എയര്വൈസ് മാര്ഷല് പി.ഇ.പദംഗെ തുടങ്ങിയവര് സംബന്ധിച്ചു.
Discussion about this post