തിരുവനന്തപുരം: ഈ നാടിന്റെ ചരിത്രത്തിലെ ഏറ്റവും വലിയ സാമൂഹ്യമാറ്റങ്ങള്‍ക്ക് സാക്ഷ്യം വഹിച്ച മന്ദിരമാണ് സെക്രട്ടേറിയറ്റെന്ന് മുഖ്യമന്ത്രി പിണറായി വിജയന്‍ പറഞ്ഞു. 150-ാം വര്‍ഷത്തില്‍ ജനക്ഷേമത്തിനും വികസനത്തിനുമായുള്ള ദൗത്യങ്ങള്‍ ഏറ്റെടുക്കുമെന്ന പ്രതിജ്ഞയെടുത്തു മുന്നേറണമെന്നും അദ്ദേഹം പറഞ്ഞു. ഗവ: സെക്രട്ടേറിയറ്റ് മന്ദിരത്തിന്റെ 150-ാം വാര്‍ഷികാഘോഷത്തിന്റെ ഉദ്ഘാടനം നിര്‍വഹിച്ചുസംസാരിക്കുകയായിരുന്നു അദ്ദേഹം.
വലിയ സാമൂഹ്യമാറ്റങ്ങള്‍ക്ക് ചാലുകീറിയ തീരുമാനങ്ങള്‍ ഈ മന്ദിരത്തിലുണ്ടായി. നമ്മുടെ നാട്ടിലെ മഹാഭൂരിപക്ഷം വരുന്ന അധ്വാനിക്കുന്ന ജനവിഭാഗങ്ങള്‍ക്ക് നട്ടെല്ലുയര്‍ത്തി ശിരസ്സുയര്‍ത്തി നില്‍ക്കാന്‍ പ്രാപ്തമാക്കിയ ഒട്ടേറെ തീരുമാനങ്ങളായിരുന്നു അവ. തിരുവിതാംകൂറും, കൊച്ചിയും, മലബാറും ഒന്നിച്ച് ഐക്യകേരളം പിറന്നു. ഒരു കാലത്ത് തിരുവിതാംകൂറിന്റെ പ്രതീകമായിരുന്ന മന്ദിരം പിന്നീട് കേരളത്തിന്റെ പ്രതീകമായി.
എല്ലാ അര്‍ഥത്തിലും പാരമ്പര്യത്തെയും ആധുനികതയെയും ബന്ധിപ്പിക്കുന്ന കാലസാക്ഷിയാണ് സെക്രട്ടേറിയറ്റ്. മഹാരാജാക്കന്‍മാരുടെ ദര്‍ബാറുകള്‍ക്കും ബ്രിട്ടീഷ് വൈസ്രോയിമാര്‍ മുതല്‍ ഗവര്‍ണര്‍ ജനറല്‍ വരെയുള്ള അധികാരാരോഹണങ്ങള്‍ക്കും റീജന്റ് മഹാറാണിമാരുടെയും മഹാരാജാക്കന്‍മാരുടെയും ജനാധിപത്യ മന്ത്രിസഭകളുടെ ഭരണത്തിനും സാക്ഷ്യം വഹിച്ചു. സെക്രട്ടേറിയറ്റ് മന്ദിരത്തിന്റെ 150-ാം വാര്‍ഷികവും, ഗാന്ധിജിയുടെ 150-ാം ജന്‍മവാര്‍ഷികവും ഒരേവര്‍ഷമാണ് വരുന്നത്. ഗാന്ധിജി ജനിച്ച വര്‍ഷം പ്രവര്‍ത്തനം തുടങ്ങിയ ഈ മന്ദിരത്തെക്കുറിച്ച് ദക്ഷിണാഫ്രിക്കയില്‍ വെച്ച് ഇന്ത്യന്‍ ഒപ്പീനിയനില്‍ എഴുതിയ ലേഖനത്തില്‍ പരാമര്‍ശിച്ചിട്ടുമുണ്ടെന്നും മുഖ്യമന്ത്രി പറഞ്ഞു.
സെക്രട്ടേറിയറ്റിന്റെ 150-ാം വാര്‍ഷികാഘോഷം ഉദ്ഘാടനം ചെയ്യുന്ന ദിവസം തന്നെ കേരള അഡ്മിനിട്രേറ്റീവ് സര്‍വീസിന്റെ വിജ്ഞാപനം വന്നതും ചരിത്രപരമാണെന്നും മുഖ്യമന്ത്രി കൂട്ടിച്ചേര്‍ത്തു. ഇന്‍ഫര്‍മേഷന്‍ പബ്‌ളിക് റിലേഷന്‍സ് വകുപ്പിന്റെ ആഭിമുഖ്യത്തില്‍ സംഘടിപ്പിക്കുന്ന ചരിത്രജാലകം ചരിത്ര ചിത്രപ്രദര്‍ശനത്തിന്റെ ഉദ്ഘാടനവും മുഖ്യമന്ത്രി നിര്‍വഹിച്ചു.
എല്ലാനിലയിലും ചരിത്രത്തിന്റെ ഭാഗമാണ് സെക്രട്ടേറിയറ്റ് മന്ദിരമെന്ന് ചടങ്ങില്‍ അധ്യക്ഷത വഹിച്ച തുറമുഖം, പുരാരേഖാ, പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി പറഞ്ഞു. ആര്‍ക്കൈവ്‌സ് വകുപ്പിന്റെ പുരാരേഖാ പ്രദര്‍ശനവും മന്ത്രി ഉദ്ഘാടനം ചെയ്തു.
വി.എസ്. ശിവകുമാര്‍ എം.എല്‍.എ, പൊതുഭരണ പ്രിന്‍സിപ്പല്‍ സെക്രട്ടറി ബിശ്വനാഥ് സിന്‍ഹ, തദ്ദേശസ്വയംഭരണ പ്രിന്‍സിപ്പല്‍ സെക്രട്ടറി ശാരദാ മുരളീധരന്‍ എന്നിവര്‍ സംബന്ധിച്ചു. ചീഫ് സെക്രട്ടറി ടോം ജോസ് സ്വാഗതവും പൊതുഭരണവകുപ്പ് ജോയിന്റ് സെക്രട്ടറി പി. ഹണി നന്ദിയും പറഞ്ഞു. തുടര്‍ന്ന് കൊച്ചിന്‍ കലാഭവന്‍ അവതരിപ്പിച്ച ഗാനമേള അരങ്ങേറി.
