തിരുവനന്തപുരം: വിവരാവകാശ നിയമത്തിന്റെ നടപ്പാക്കലിലും വിവരങ്ങളും വെളിപ്പെടുത്തലിലും വിവരസാങ്കേതികവിദ്യാസേവനങ്ങള്‍ കൂടുതല്‍ പ്രയോജനപ്പെടുത്തണമെന്ന് ഗവര്‍ണര്‍ ആരിഫ് മുഹമ്മദ് ഖാന്‍ പറഞ്ഞു. സംസ്ഥാന വിവരാവകാശ കമ്മീഷന്റെ ആഭിമുഖ്യത്തില്‍ ‘വിവരാവകാശനിയമം: തദ്ദേശസ്ഥാപനങ്ങളുടെ ഉത്തരവാദിത്തങ്ങളും കടമകളും’ എന്ന വിഷയത്തില്‍ സംഘടിപ്പിച്ച ശില്‍പശാല ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
വിവരാവകാശനിയമത്തിന്റെ നടപ്പാക്കലിന് ഇലക്ട്രോണിക് ആശയവിനിമയ സാധ്യതകളും ഇ-പേയ്മെന്റും ഉള്‍പ്പെടെ പ്രോത്സാഹിപ്പിക്കപ്പെടണം. വിവരങ്ങള്‍ തേടിയുള്ള ചോദ്യങ്ങള്‍ക്ക് മുന്നില്‍ നീരസം പ്രകടിപ്പിക്കരുത്, അവയാണ് സംവാദങ്ങള്‍ക്ക് വഴിമരുന്നിടുന്നത്. ജനങ്ങളുടെ ചോദ്യങ്ങളിലൂടെയാണ് ലോകമാകെ ജനാധിപത്യം ശക്തിപ്പെട്ടതെന്നും അദ്ദേഹം പറഞ്ഞു.
പൗരന്‍മാര്‍ക്ക് അവകാശങ്ങള്‍ക്കൊപ്പം കടമകളും ഉണ്ട്. മികച്ചതും സുതാര്യവുമായതുമായ സര്‍ക്കാര്‍ പൊതുസമൂഹത്തിന്റെ സജീവ ഇടപെടലിലൂടെയേ സാധ്യമാകൂ. വിവരാവകാശ നിയമം നടപ്പാക്കിയത് സുതാര്യത ഉറപ്പാക്കാനും ജനങ്ങളെ വിലപ്പെട്ട വിവരങ്ങളിലൂടെ ശാക്തീകരിക്കാനുമാണ്. ഈ പ്രക്രിയയില്‍ ഉദ്യോഗസ്ഥരുടെ സഹകരണം വേണം. നിരന്തരമായി വിവരങ്ങള്‍ പുതുക്കാനും ആവശ്യത്തിന് ലഭ്യമാക്കാനും സംവിധാനം വേണം. ആവശ്യപ്പെടുന്ന വിവരങ്ങള്‍ സംബന്ധിച്ച് പൊതുജനങ്ങള്‍ക്കും കൃത്യമായ ധാരണയുണ്ടാവണമെന്ന് അദ്ദേഹം പറഞ്ഞു.
ചടങ്ങില്‍ മുഖ്യ വിവരാവകാശ കമ്മീഷണര്‍ വിന്‍സണ്‍ എം. പോള്‍ അധ്യക്ഷത വഹിച്ചു. വിവരാവകാശ കമ്മീഷണര്‍മാരായ പി.ആര്‍. ശ്രീലത, കെ.വി. സുധാകരന്‍ എന്നിവര്‍ സംബന്ധിച്ചു. വിവരാവകാശ കമ്മീഷണര്‍മാരായ സോമനാഥന്‍ പിള്ള സ്വാഗതവും ഡോ. കെ.എല്‍. വിവേകാനന്ദന്‍ നന്ദിയും പറഞ്ഞു. തദ്ദേശസ്ഥാപനങ്ങളിലെ ഉദ്യോഗസ്ഥര്‍ക്കായാണ് ശില്‍പശാല സംഘടിപ്പിച്ചത്.
