തിരുവനന്തപുരം: സൂര്യനെപ്പോലെ കേരളത്തിലെല്ലായിടത്തും വെളിച്ചമെത്തിക്കാന് കേരള നിയമസഭയുടെ സഭാ ടിവിയ്ക്കാവുമെന്ന് ഗവര്ണര് ആരിഫ് മുഹമ്മദ് ഖാന് പറഞ്ഞു. കേരള നിയമസഭ ആരംഭിക്കുന്ന സഭ ടിവിയുടെ ലോഗോയുടെയും തീം മ്യൂസിക്കിന്റേയും പ്രകാശനവും നിയമസഭാ മാധ്യമ പുരസ്കാര വിതരണവും നിര്വഹിക്കുകയായിരുന്നു അദ്ദേഹം.
സഭാ ടിവിയിലൂടെ ജനങ്ങള്ക്ക് സഭാ നടപടികളെക്കുറിച്ചും ക്രമങ്ങളെക്കുറിച്ചും കൃത്യമായ വിവരം നല്കാനാവും. അറിവുള്ള ജനങ്ങളെയാണ് സത്പുരുഷന്മാര് എന്ന് വിളിക്കുന്നത്. ശരിയായ വിവരം നല്കി ജനങ്ങളെ സത്പുരുഷന്മാരാക്കാനാവുമെന്ന് ഗവര്ണര് പറഞ്ഞു.
ജനാധിപത്യ സംവിധാനങ്ങളെ ചിലര് മുന്വിധിയോടെ കാണാറുണ്ട്. ശരിയായ വിവരം അവരിലേക്ക് എത്തിക്കാനായാല് ഇതിന് മാറ്റമുണ്ടാവും. രാജ്യത്തിന്റെ രാഷ്ട്രീയ ചരിത്രത്തില് കേരള നിയമസഭയ്ക്ക് പ്രത്യേക സ്ഥാനമുണ്ട്. ജനക്ഷേമത്തിനായി നിരവധി നടപടികള് കേരള നിയമസഭ സ്വീകരിച്ചിട്ടുണ്ട്. പലതും പിന്നീട് മറ്റു സംസ്ഥാനങ്ങള് ഏറ്റെടുക്കുകയും ചെയ്തു. കേരള ഭൂപരിഷ്കരണ നിയമം, തൊഴിലാളി ക്ഷേമം, വിദ്യാഭ്യാസ പുരോഗതി തുടങ്ങി നിരവധ സുപ്രധാന തീരുമാനങ്ങള് കേരള നിയമസഭ കൈക്കൊണ്ടു. കേരള നിയമസഭ മറ്റു നിയമസഭകള്ക്ക് പല കാര്യങ്ങളിലും റോള് മോഡലാണെന്നും ഗവര്ണര് പറഞ്ഞു. ഡിജിറ്റല് മാധ്യമ സാധ്യതകള് പ്രയോജനപ്പെടുത്തി സഭാ നടപടികള് ജനങ്ങളില് എത്തിക്കാന് നടപടി സ്വീകരിച്ച നിയമസഭാ സ്പീക്കറെ ഗവര്ണര് അഭിനന്ദിച്ചു. സഭാ ടിവി ഒരു മുഴുവന് സമയ ചാനലായി മാറട്ടെയെന്നും ആശംസിച്ചു. മാധ്യമ അവാര്ഡ് ജേതാക്കള്ക്ക് ഗവര്ണര് പുരസ്കാരം വിതരണം ചെയ്തു.
നിയമസഭയിലെ നല്ല കാര്യങ്ങള് മാധ്യമങ്ങളിലൂടെ ജനങ്ങളിലെത്തിക്കുകയാണ് സഭാ ടിവിയുടെ ഉദ്ദേശ്യമെന്ന് മുഖ്യാതിഥിയായ മുഖ്യമന്ത്രി പിണറായി വിജയന് പറഞ്ഞു. ഇതിന്റെ തുടര് പ്രവര്ത്തനം അനുസരിച്ചാവും മാറ്റങ്ങള് തീരുമാനിക്കുകയെന്നും അദ്ദേഹം അഭിപ്രായപ്പെട്ടു.
സഭാ ടിവി നിഷ്പക്ഷമായി പ്രവര്ത്തിക്കുമെന്ന് അധ്യക്ഷത വഹിച്ച സ്പീക്കര് പി. ശ്രീരാമകൃഷ്ണന് പറഞ്ഞു. ജനുവരി ഒന്നിന് സഭാ ടിവിയ്ക്ക് തുടക്കം കുറിക്കാനാണ് ശ്രമിക്കുന്നത്. കൃത്യമായി നടക്കുന്ന സഭയാണ് കേരളത്തിലേത്. യാന്ത്രികമായോ ലാഘവത്തോടെയോ ഒരു നിയമവും ഈ സഭയില് പാസായി പോകാറില്ല. അംഗങ്ങള് കൃത്യമായി പഠിച്ചെത്തിയാണ് കാര്യങ്ങള് അവതരിപ്പിക്കുന്നത്. വിമര്ശനങ്ങള്ക്കൊപ്പം മാധ്യമങ്ങള് പോസിറ്റീവായ കാര്യങ്ങള് കൂടി ജനങ്ങളിലെത്തിക്കണമെന്നും സ്പീക്കര് പറഞ്ഞു.
പട്ടികജാതി പട്ടികവര്ഗ പിന്നാക്കക്ഷേമ മന്ത്രി എ. കെ. ബാലന്, പ്രതിപക്ഷ നേതാവ് രമേശ് ചെന്നിത്തല എന്നിവര് സംസാരിച്ചു. ഡെപ്യൂട്ടി സ്പീക്കര് വി. ശശി സ്വാഗതവും നിയമസഭ സെക്രട്ടറി എസ്. വി. ഉണ്ണികൃഷ്ണന് നായര് നന്ദിയും പറഞ്ഞു.
Discussion about this post