സന്നിധാനം: ഈ മണ്ഡലതീര്ത്ഥാടനവേളയില് ശബരിമലയിലെത്തുന്ന അയ്യപ്പ ഭക്തരെ പോലീസ് ഉദ്യോഗസ്ഥര് സ്വാമി എന്ന് തന്നെ അഭിസംബോധന ചെയ്യണമെന്ന് ശബരിമലയിലെ സുരക്ഷാ ചുമതലയുള്ള എഐജി രാഹുല് ആര് നായര്. തീര്ത്ഥാടനം തുടങ്ങുന്നതിന് മുന്നോടിയായി വിളിച്ച പോലീസ് ഉദ്യോഗസ്ഥരുടെ മീറ്റിംഗിലാണ് രാഹുല് ആര് നായരുടെ നിര്ദ്ദേശം. ശരണം വിളിയോടെയാണ് പോലീസ് മീറ്റിംഗ് ആരംഭിച്ചത്.
കഴിഞ്ഞ മകരവിളക്ക് സീസണില് സ്വാമി എന്ന് വിളിക്കേണ്ടെന്ന് നിര്ദ്ദേശമുണ്ടായിരുന്നു. പോലീസിന്റെ ഇത് അടക്കമുള്ള നിലപാട് മൂലം തീര്ത്ഥാടന കാലത്ത് ശബരിമല സംഘര്ഷഭരിതമായിരുന്നു. ശബരിമലയില് യുവതികളെ ഇപ്പോള് പ്രവേശിപ്പിക്കേണ്ടെന്ന് സര്ക്കാരിന് നിയമോപദേശം ലഭിച്ചതിനാല് സര്ക്കാരും പോലീസും ഇത്തവണ അതിന് മുതിരില്ല. യുവതികള് എത്തിയാല് പമ്പയില് തടയണമെന്ന് പോലീസിന് നിര്ദ്ദേശവും ലഭിച്ചിട്ടുണ്ട്.
മണ്ഡലമകരവിളക്ക് പൂജകള്ക്കായി ഇന്ന് വൈകുന്നേരമാണ് ശബരിമല നടതുറക്കുന്നത്. വൈകുന്നേരം അഞ്ച് മണിയ്ക്ക് തന്ത്രി കണ്ഠരര് മഹേഷ് മോഹനരുടെ മുഖ്യകാര്മ്മികത്വത്തില്മേല്ശാന്തി നടതുറക്കും. പുതിയ മേല്ശാന്തിമാരുടെ സ്ഥാനാരോഹണ ചടങ്ങുകള് മാത്രമാണ് ഇന്ന് നടക്കുന്നത്.
Discussion about this post