പത്തനംതിട്ട: മണ്ഡലകാലം ആരംഭിച്ച ദിവസം തന്നെ ശബരിമലയില് വന് ഭക്തജനത്തിരക്ക്. കാനനപാതയായ ഇടുക്കി വണ്ടിപ്പെരിയാര് സത്രം വഴി തീര്ത്ഥാടകരെ സന്നിധാനത്തേയ്ക്ക് കയറ്റിവിടാന് തുടങ്ങി. കര്ശന പരിശോധനയ്ക്ക് ശേഷമാണ് ഭക്തരെ കയറ്റി വിടുന്നത്. രാവിലെ എട്ടുമണിയോടെയാണ് തീര്ത്ഥാടകരെ കടത്തിവിട്ടു തുടങ്ങിയത്.
കാനനപാതയില് അഞ്ചിടങ്ങളില് വനംവകുപ്പ് കുടിവെള്ളവും അവശ്യ ചികിത്സാ സഹായവും സജ്ജമാക്കിയിട്ടുണ്ട്. ഉപ്പുതോടില് ഭക്ഷണം നല്കുന്നതിനായി എക്കോ ഷോപ്പും ഒരുക്കിയിട്ടുണ്ട്. വണ്ടിപ്പെരിയാറിലും സത്രത്തിലും വന് സുരക്ഷാ ക്രമീകരണമാണ് ഒരുക്കിയിട്ടുള്ളത്.
അതേസമയം തീര്ത്ഥാടകര്ക്കായുള്ള അടിസ്ഥാന സൗകര്യങ്ങള് ഇത്തവണയും കാര്യമായി ഒരുക്കിയിട്ടില്ലെന്ന് പരാതി ഉയരുന്നുണ്ട്. ശുചിമുറികള് ഉള്പ്പെടെയുള്ളവയുടെ കുറവ് തീര്ത്ഥാടകര്ക്ക് ബുദ്ധിമുട്ട് സൃഷ്ടിക്കുന്നുവെന്നും പരാതി ഉയരുന്നു. ദേവസ്വം ബോര്ഡിന്റെ അനാസ്ഥയാണ് അടിസ്ഥാന സൗകര്യവികസനത്തിന് തടസ്സമെന്ന് വണ്ടിപെരിയാര് പഞ്ചായത്ത് അധികൃതര് ആരോപിച്ചു.
Discussion about this post