പമ്പ: മുതിര്ന്ന പൗരന്മാരുടെ ക്ഷേമം സംബന്ധിച്ച് തൃപ്തികരമായ പ്രവൃത്തനങ്ങളാണു മണ്ഡല-മകരവിളക്ക് തീര്ഥാടനത്തോട് അനുബന്ധിച്ച് വിവിധ വകുപ്പുകളുടെ നേതൃത്വത്തില് ശബരിമലയില് ചെയ്തിരിക്കുന്നതെന്ന് മുതിര്ന്ന പൗരന്മാരുടെ ക്ഷേമം സംബന്ധിച്ച നിയമസഭാ സമിതി ചെയര്മാന് സി.കെ നാണു എം.എല്.എ പറഞ്ഞു. ശബരിമല ദര്ശനത്തിന് എത്തുന്ന മുതിര്ന്ന പൗരന്മാര്ക്കു ലഭ്യമാക്കേണ്ട സൗകര്യങ്ങളെപ്പറ്റി പമ്പ ദേവസ്വം ബോര്ഡ് ശ്രീരാമ സങ്കേതം ഓഡിറ്റോറിയത്തില് നിയമസഭാ സമിതി നടത്തിയ അവലോകന യോഗത്തില് അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.
പമ്പാ നദിയില് ഭക്തര്ക്ക് കുളിക്കുവാന് മതിയാകുന്ന വിധത്തില് വെള്ളത്തിന്റെ തോത് കൂട്ടുവാനും നദിയിലേക്ക് ഇടിഞ്ഞു വീണു കിടക്കുന്ന പ്ലാസ്റ്റിക് ചാക്കുകള് ദേവസ്വം ബോര്ഡിന്റേയും ശുചിത്വമിഷന്റെയും നേതൃത്വത്തില് നീക്കം ചെയ്യുവാനും സമിതി നിര്ദേശിച്ചു. ശബരിമലയിലേക്ക് ഒറ്റപ്പെട്ടു വരുന്ന മുതിര്ന്ന പൗരന്മാരെ സഹായിക്കുന്നതിനുള്ള ചുമതല നമുക്ക് ഓരോരുത്തര്ക്കുമുണ്ട്. സന്നിധാനത്ത് മുതിര്ന്ന പൗരന്മാരെ കൈ പിടിച്ച് എത്തിക്കുവാനുള്ള നടപടികള് വിവിധ വകുപ്പുകള് സഹകരിച്ച് നടത്തണം. ഭക്തജനങ്ങളുടെ വരവില് ഉദ്യോഗസ്ഥരുടെ സൂക്ഷ്മതാക്കുറവ് കാരണം ഒരു അപകടവും സംഭവിക്കുന്നില്ലെന്നും ഉറപ്പുവരുത്തണം. സ്ത്രീകളായ ഭക്തര്ക്കു പമ്പയില് കുളി കഴിഞ്ഞു വസ്ത്രം മാറുന്നതിന് ആവശ്യമായ സൗകര്യങ്ങള് ഒരുക്കണം. പമ്പയില് നിന്നു സന്നിധാനത്തേക്ക് ഡോളി കൂലി നിരക്കില് ഏകീകൃത സംവിധാനം ഏര്പ്പെടുത്തണമെന്നും നിയമസഭാ സമിതി നിര്ദ്ദേശിച്ചു.
നിയമസഭാ സമിതി അംഗങ്ങളും എം.എല്.എമാരുമായ കെ.യു അരുണന്, എന്.ജയരാജ്, ജോണ് ഫെര്ണാണ്ടസ്, ആര്.രാമചന്ദ്രന്, ശബരിമലയുടെ ചുമതലയുള്ള എഡിഎം: എന്.എസ്.കെ ഉമേഷ്, തിരുവല്ല സബ് കളക്ടര് ഡോ.വിനയ് ഗോയല്, അടൂര് ആര്ഡിഒ:പി.ടി എബ്രഹാം, പമ്പ അഡീഷണല് സ്പെഷ്യല് ഓഫീസര് അരവിന്ദ് സുകുമാര്, പമ്പ സ്പെഷ്യല് ഓഫീസര് സാബു മാത്യു, വിവിധ വകുപ്പ് മേധാവികള്, ദേവസ്വം ബോര്ഡ് പ്രതിനിധികള് തുടങ്ങിയവര് പങ്കെടുത്തു.
