തിരുവനന്തപുരം: സംസ്ഥാനത്ത് വില്‍ക്കുന്ന ഭക്ഷണപദാര്‍ത്ഥങ്ങളുടെ ഗുണനിലവാരം പരിശോധിക്കുന്നതിന് കൃത്യമായ സംവിധാനം നടപ്പാക്കണമെന്ന് മുഖ്യമന്ത്രി പിണറായി വിജയന്‍ പറഞ്ഞു. തിരുവനന്തപുരം ഗസ്റ്റ് ഹൗസില്‍ നടന്ന ജില്ലാ കളക്ടര്‍മാരുടേയും വകുപ്പ് മേധാവികളുടേയും വാര്‍ഷിക സമ്മേളനത്തിന്റെ രണ്ടാം ദിവസത്തെ യോഗത്തില്‍ സംസാരിക്കുകയായിരുന്നു അദ്ദേഹം.
മത്സ്യം, ഇറച്ചി, പച്ചക്കറി, പാചക എണ്ണ തുടങ്ങി എല്ലാം പരിശോധിക്കണം. ജില്ലകളിലെ തട്ടുകടകളിലും പ്രധാന ഹോട്ടലുകളിലുമടക്കം എല്ലായിടത്തും നിശ്ചിത ഇടവേളകളില്‍ പരിശോധന നടക്കണം. മായം കലര്‍ന്ന സാധനങ്ങളുടെ വില്‍പന നടക്കുന്നുണ്ട്. മത്സ്യങ്ങള്‍ പരിശോധിക്കാന്‍ നേരത്തെ ഇടപെടലുണ്ടായിരുന്നു. തുടര്‍ച്ചയായ പരിശോധനയാണ് വേണ്ടതെന്ന് മുഖ്യമന്ത്രി പറഞ്ഞു. ജനുവരി ഒന്നു മുതല്‍ സംസ്ഥാനത്ത് പ്ലാസ്റ്റിക് നിരോധിക്കാനുള്ള തീരുമാനം ഫലപ്രദമായി നടപ്പാക്കണമെന്ന് മുഖ്യമന്ത്രി ജില്ലാ കളക്ടര്‍മാര്‍ക്കും മറ്റു വകുപ്പുതല ഉദ്യോഗസ്ഥര്‍ക്കും നിര്‍ദ്ദേശം നല്‍കി.
റിപബ്ളിക് ദിനത്തോടനുബന്ധിച്ച് ദേശീയ, സംസ്ഥാന പാതയോരങ്ങളില്‍ നിന്ന് പ്ലാസ്റ്റിക് ഉള്‍പ്പെടെയുള്ള മാലിന്യങ്ങള്‍ നീക്കം ചെയ്യാന്‍ ഏകദിന തീവ്രപരിപാടി സംഘടിപ്പിക്കുന്നത് സംബന്ധിച്ച് യോഗം ചര്‍ച്ച ചെയ്തു. ജനുവരി 25ന് പഞ്ചായത്ത് തലം മുതല്‍ മാലിന്യനിര്‍മാര്‍ജന പരിപാടി നടക്കും. ജനങ്ങളുടേയും സന്നദ്ധപ്രവര്‍ത്തകരുടേയും, എന്‍. എസ്. എസ്, എന്‍. സി. സി, ഹരിത കര്‍മസേന എന്നിവരുടേയും സഹകരണം ഉറപ്പാക്കും.
സഹകരണ വകുപ്പ് നടപ്പാക്കുന്ന കെയര്‍ കേരള പദ്ധതിയുടെ രണ്ടാം ഘട്ടം ആരംഭിക്കുന്നതിനെക്കുറിച്ച് യോഗം ചര്‍ച്ച ചെയ്തു. രണ്ടാം ഘട്ടത്തിന്റെ ഉദ്ഘാടനം ജനുവരിയില്‍ തൃശൂരില്‍ മുഖ്യമന്ത്രി ഉദ്ഘാടനം ചെയ്യും.
1901 വീടുകളുടെ നിര്‍മാണം പൂര്‍ത്തിയാക്കി താക്കോല്‍ ഗുണഭോക്താക്കള്‍ക്ക് കൈമാറി. ഈ മാസം തന്നെ 2000 വീടുകളും പൂര്‍ത്തിയാകും. കൃഷി, തുറമുഖം, സാംസ്‌കാരികം, പരിസ്ഥിതി, പൊതുവിദ്യാഭ്യാസം, ഉന്നത വിദ്യാഭ്യാസം, ആരോഗ്യം, ആഭ്യന്തരം, ഭവനനിര്‍മാണം, വ്യവസായം, തദ്ദേശസ്വയംഭരണം, കായിക യുവജനകാര്യ വകുപ്പുകളുടെ വിവിധ പ്രവര്‍ത്തനങ്ങളെക്കുറിച്ച് യോഗം ചര്‍ച്ച ചെയ്തു.
മന്ത്രിമാരായ ഇ. പി. ജയരാജന്‍, എ. സി. മൊയ്തീന്‍, രാമചന്ദ്രന്‍ കടന്നപ്പള്ളി, പ്രൊഫ. സി. രവീന്ദ്രനാഥ്, ഡോ. കെ. ടി. ജലീല്‍, കെ. കെ. ശൈലജ ടീച്ചര്‍, കടകംപള്ളി സുരേന്ദ്രന്‍, സംസ്ഥാന ആസൂത്രണ ബോര്‍ഡ് വൈസ് ചെയര്‍മാന്‍ ഡോ. വി. കെ. രാമചന്ദ്രന്‍, ചീഫ് സെക്രട്ടറി ടോം ജോസ്, വിവിധ വകുപ്പുതല ഉദ്യോഗസ്ഥര്‍ എന്നിവര്‍ യോഗത്തില്‍ സംബന്ധിച്ചു.
