ന്യൂഡല്ഹി: ശബരിമല സന്നിധാനത്ത് പ്രതിദിനം എത്തുന്ന തീര്ഥാടകരുടെ എണ്ണം 36,000 ല് നിന്നും ഇരട്ടിയാക്കണമെന്ന ദേവസ്വം ബോര്ഡ് നിര്ദേശം സുപ്രീംകോടതി എംപവേര്ഡ് കമ്മിറ്റി തള്ളി. ശബരിമല മാസ്റ്റര് പ്ലാന് പ്രകാരം നിലവില് പ്രതിദിനം സന്നിധാനത്ത് എത്തുന്ന ഭക്തരുടെ എണ്ണം 36,000 ആയി നിജപ്പെടുത്തിയിരുന്നു.
വൈകിട്ട് സന്നിധാനത്ത് എത്തുന്ന ഭക്തര്ക്ക് നെയ്യഭിഷേകം നടത്താനായി സന്നിധാനത്ത് തങ്ങേണ്ടിവരുന്നതിനാല് ഭക്തരുടെ എണ്ണം നിയന്ത്രിക്കാന് കഴിയില്ലെന്ന് ദേവസ്വം ബോര്ഡ് ചൂണ്ടിക്കാട്ടിയിരുന്നു. എന്നാല് ശബരിമലയില് ദര്ശനം നടത്തുന്ന എല്ലാ തീര്ത്ഥാടകരും നെയ്യഭിഷേകം നടത്തുന്നില്ലെന്ന് എംപവേര്ഡ് കമ്മിറ്റി മെമ്പര് സെക്രട്ടറി അമര്നാഥ് ഷെട്ടി യോഗത്തില് ചൂണ്ടിക്കാട്ടിയതിനെത്തുടര്ന്നാണ് ഈ ആവശ്യം തള്ളിയത്.
അതേസമയം വിഷയത്തില് എംപവേര്ഡ് കമ്മിറ്റി ഏകപക്ഷീയമായ നിലപാടാണ് സ്വീകരിക്കുന്നതെന്ന് തിരുവിതാംകൂര് ദേവസ്വം ബോര്ഡ് പ്രസിഡന്റ് എന്. വാസു പറഞ്ഞു. കമ്മിറ്റിക്ക് പ്രതിദിന തീര്ഥാടകരുടെ എണ്ണം 36000 ആണെന്നുള്ള കണക്ക് എങ്ങനെ കിട്ടിയെന്ന് ദേവസ്വം ബോര്ഡിനറിയില്ലെന്നും അങ്ങനെ ഒരു കണക്ക് തങ്ങള് നല്കിയിട്ടില്ലെന്നും അദ്ദേഹം പറഞ്ഞു.
Discussion about this post