തിരുവനന്തപുരം: മാനവസംസ്കാരത്തിന്റെ ഉറവിടങ്ങളായ നദികള് സംരക്ഷിക്കാന് കൂട്ടായ പരിശ്രമമുണ്ടാവണമെന്ന് റവന്യൂ മന്ത്രി ഇ. ചന്ദ്രശേഖരന് പറഞ്ഞു. ജലസ്രോതസുകള് നിലച്ചാല് ജീവന്റെ നിലനില്പ്പ് ഇല്ലാതാകും. ഇതിനെതിരെ സംഘടിതമായി പരിശ്രമിച്ചാല് നദീപുനരുജ്ജീവനം സാധ്യമാകുമെന്നും മന്ത്രി പറഞ്ഞു. ഇന്സ്റ്റിറ്റ്യൂട്ട് ഓഫ് ലാന്ഡ് ആന്ഡ് ഡിസാസ്റ്റര് മാനേജ്മെന്റില് നദീപരിപാലനത്തിന് ജൈവമാര്ഗ്ഗങ്ങള് എന്ന വിഷയത്തില് സംഘടിപ്പിച്ച ഏകദിന ശില്പശാല ഉദ്ഘാടനം ചെയ്യുകയായിരുന്നു അദ്ദേഹം.
ജലവും മണലുമുള്പ്പെടെയുള്ളവ കമ്പോളത്തിലെത്തിക്കുന്നതിന് വലിയ ശ്രമങ്ങളാണ് ഇന്ന് നടക്കുന്നത്. പ്രകൃതി വിഭവങ്ങള് ഭാവിതലമുറയില് നിന്ന് കടംകൊണ്ടവയാണെന്ന ചിന്ത എല്ലാവര്ക്കുമുണ്ടാകണം. ഭാവി തലമുറയ്ക്കായി പ്രകൃതിയെ സംരക്ഷിച്ചു നിര്ത്താന് വലിയ ഇടപെടല് നടത്തണമെന്നും മന്ത്രി പറഞ്ഞു.
നദീതടത്തിന്റെയും ജലത്തിന്റെയും സംയോജിത സംരക്ഷണ പരിപാലനത്തിന് നവകേരള നിര്മ്മിതിയുടെ ഭാഗമായി പ്രോത്സാഹിപ്പിക്കേണ്ട ജൈവമാര്ഗ്ഗങ്ങള് വിശകലനം ചെയ്യുന്നതിനാണ് ശില്പശാല സംഘടിപ്പിച്ചത്.
നദീപരിപാലനത്തിനായി ആഗോളതലത്തില് പ്രോത്സാഹിപ്പിക്കുന്ന ജൈവമാര്ഗ്ഗങ്ങള്, നദീസംരക്ഷണ ജൈവമാര്ഗ്ഗ കര്മ്മ പദ്ധതി തയ്യാറാക്കല്, നദികളുടെ പുനരുജ്ജീവനത്തിന് ദേശീയ ഗ്രാമീണ തൊഴിലുറപ്പുപദ്ധതിയുടെ പങ്കാളിത്തം, ജലസമൃദ്ധി പദ്ധതി എന്നീ വിഷയങ്ങളില് ബന്ധപ്പെട്ട വിദഗ്ദ്ധര് വിഷയാവതരണം നടത്തി.
Discussion about this post