കൊച്ചി: മുതിര്ന്ന എന്സിപി നേതാവും കുട്ടനാട് എംഎല്എയുമായിരുന്ന തോമസ് ചാണ്ടി അന്തരിച്ചു. 72 വയസായിരുന്നു പിണറായി സര്ക്കാരില് ഗതാഗതവകുപ്പ് മന്ത്രിയായിരുന്നു. അര്ബുദരോഗ ബാധിതനായി ദീര്ഘനാളായി ചികിത്സയിലായിരുന്നു. നിലവില് എന്സിപിയുടെ സംസ്ഥാന അദ്ധ്യക്ഷനാണ്. എറണാകുളം കടവന്ത്രയിലുള്ള വസതിയില് വച്ചായിരുന്നു അന്ത്യം സംഭവിച്ചത്.
അര്ബുദബാധയെ തുടര്ന്ന് കഴിഞ്ഞ പത്ത് വര്ഷത്തിലേറെയായി രാജ്യത്തെ വിവിധ ആശുപത്രികളിലും വിദേശത്തും അദ്ദേഹം ചികിത്സ തേടിയിരുന്നു. കഴിഞ്ഞ ദിവസങ്ങളില് അദ്ദേഹം റേഡിയേഷന് അടക്കമുള്ള ചികിത്സയ്ക്കായി ആശുപത്രിയിലായിരുന്നു. ഇന്ന് ആരോഗ്യനില കൂടുതല് വഷളായി മരണപ്പെടുകയായിരുന്നു. തോമസ് ചാണ്ടിക്ക് വിദേശത്തും സ്വദേശത്തുമായി നിരവധി വ്യവസായ സ്ഥാപങ്ങളുണ്ട്.
കുട്ടനാട് മണ്ഡലത്തില്നിന്നുള്ള നിയമസഭാംഗവും, കുവൈത്ത് കേന്ദ്രമാക്കിയുള്ള പ്രമുഖ വ്യവസായിയുമാണ് തോമസ് ചാണ്ടി, ഹണി ട്രാപ്പ് കേസില് കുടുങ്ങി മന്ത്രി എകെ ശശീന്ദ്രന് രാജിവെച്ചതിനെ തുടര്ന്ന് 2017 ഏപ്രിലിലാണ് തോമസ് ചാണ്ടി പിണറായി മന്ത്രിസഭയില് ഗതാഗത മന്ത്രിയായി അധികാരമേറ്റത്. ടൂറിസം വ്യവസായിയും ആലപ്പുഴ ലേക്ക് പാലസ് റിസോര്ട്ടിന്റെ സിഎംഡിയുമാണ്. ഭാര്യ മേഴ്സിക്കുട്ടി, ഒരു മകനും രണ്ട് പെണ്മക്കളും അടങ്ങിയതാണ് തോമസ് ചാണ്ടിയുടെ കുടുംബം.
