തിരുവനന്തപുരം: ദേവസ്വം റിക്രൂട്ട്‌മെന്റ്ില്‍ ബോര്‍ഡ് കേരളത്തിനും രാജ്യത്തിനും മാതൃകയാണെന്ന് ദേവസ്വം മന്ത്രി കടകംപള്ളി സുരേന്ദ്രന്‍. ദേവസ്വം നിയമനങ്ങള്‍ അഴിമതി വിമുക്തമാക്കാനും സുതാര്യമായ പരീക്ഷാ നടത്തിപ്പിനും ബോര്‍ഡിനായതായി മന്ത്രി പറഞ്ഞു. തൈക്കാട് സര്‍ക്കാര്‍ ഗസ്റ്റ് ഹൗസില്‍ റിക്രൂട്ട്മെന്റ് ബോര്‍ഡ് ചെയര്‍മാന്റെയും അംഗങ്ങളുടെയും സത്യപ്രതിജ്ഞാചടങ്ങില്‍ സംസാരിക്കുകയായിരുന്നു അദ്ദേഹം.
ബോര്‍ഡ് ചെയര്‍മാനായി അഡ്വ. എം. രാജഗോപാലന്‍ നായര്‍, അംഗങ്ങളായി ജി. എസ്. ഷൈലാമണി, പി.സി. രവീന്ദ്രനാഥന്‍ എന്നിവരാണ് സത്യപ്രതിജ്ഞ ചെയ്തു ചുമതലയേറ്റത്. ഇന്ത്യയുടെ ചരിത്രത്തിലാദ്യമായി സാമ്പത്തികമായി പിന്നാക്കം നില്‍ക്കുന്ന മുന്നോക്ക വിഭാഗങ്ങള്‍ക്ക് സംവരണം ഏര്‍പ്പെടുത്താന്‍ ബോര്‍ഡിനായി. ക്ലാര്‍ക്ക്/സബ്ഗ്രൂപ്പ് ഓഫീസര്‍ തസ്തികയില്‍ ഈ വിഭാഗത്തിലുള്ള ആറ് പേര്‍ക്ക് ഉടന്‍ നിയമനം നല്‍കും. സംവരണ വ്യവസ്ഥ പാലിച്ച് പിന്നാക്ക വിഭാഗങ്ങളെ ക്ഷേത്രത്തില്‍ ശാന്തിമാരായി നിയമിക്കാന്‍ നേതൃത്വം നല്‍കി. കഴിഞ്ഞ മൂന്ന് വര്‍ഷത്തിനുള്ളില്‍ ഇരുപതിലധികം തെരഞ്ഞെടുപ്പ് പ്രക്രിയകളാണ് തിരുവിതാംകൂര്‍, കൊച്ചിന്‍, മലബാര്‍ ദേവസ്വം ബോര്‍ഡുകളിലായി നടന്നത്. പരിമിതമായ ജീവനക്കാരും സൗകര്യവുമാണ് ബോര്‍ഡിനുള്ളതെങ്കിലും സുതാര്യമായ പരീക്ഷാ നടത്തിപ്പിനും നിയമനത്തിനും റിക്രൂട്ട്മെന്റ് ബോര്‍ഡ് മുന്‍തൂക്കം നല്‍കുന്നു. മൂന്ന് വര്‍ഷത്തെ തൃപ്തികരമായ പ്രവര്‍ത്തനത്തിന്റെ അടിസ്ഥാനത്തിലാണ് മുന്‍ അംഗങ്ങളെ തന്നെ നിലനിര്‍ത്തിയതെന്നും മന്ത്രി പറഞ്ഞു.
ദേവസ്വം സെക്രട്ടറി കെ.ആര്‍.ജ്യോതിലാല്‍, ദേവസ്വം റിക്രൂട്ട്മെന്റ് ബോര്‍ഡ് ഉദ്യോഗസ്ഥര്‍ തുടങ്ങിയവര്‍ സംബന്ധിച്ചു.
