തിരുവനന്തപുരം: കാട്ടുതീ പ്രതിരോധ പ്രവര്ത്തനങ്ങള് ശക്തമാക്കാന് ആധുനിക ഫയര് റെസ്പോണ്ടര് വാഹനങ്ങളുമായി വനംവകുപ്പ്. വാഹനങ്ങളുടെ ഫ്ളാഗ് ഓഫ് സെക്രട്ടേറിയറ്റ് അനക്സില് വനം മന്ത്രി അഡ്വ കെ രാജു നിര്വഹിച്ചു. വനസംരക്ഷണ പ്രവര്ത്തനങ്ങള്ക്ക് പരമ്പരാഗതമായി പിന്തുടരുന്ന രീതികള്ക്കൊപ്പം അത്യന്താധുനിക സംവിധാനങ്ങളുടെ സഹായം ഉപയോഗപ്പെടുത്തിയുള്ള പ്രവര്ത്തനങ്ങള്ക്ക് മുന്തൂക്കം നല്കുമെന്ന് മന്ത്രി പറഞ്ഞു.
കാട്ടുതീ പ്രതിരോധ പ്രവര്ത്തനങ്ങള് കാര്യക്ഷമമാക്കുന്നതിന് ഈ വാഹനങ്ങള് ഉപകാരപ്രദമാണ്. ഉള്വനങ്ങളിലേക്ക് പോലും കൂപ്പു റോഡുകളിലൂടെ വേഗത്തിലെത്തി അഗ്നി ശമന-പ്രതിരോധ പ്രവര്ത്തനങ്ങളിലും മറ്റു അനുബന്ധ രക്ഷാപ്രവര്ത്തനങ്ങളിലും ഏര്പ്പെടാവുന്ന തരത്തിലുള്ള വാഹനങ്ങളാണിത്. രക്ഷാപ്രവര്ത്തകര്ക്ക് ധരിക്കാനുള്ള ആധുനിക ഫയര്സ്യൂട്ട്, മറ്റു അനുബന്ധ ഉപകരണങ്ങള് എന്നിവ വാഹനങ്ങളില് സജ്ജമാക്കിയിട്ടുണ്ടെന്നും മന്ത്രി പറഞ്ഞു.
ജര്മ്മന് സാങ്കേതിക വിദ്യ ഉപയോഗിച്ച് പ്രവര്ത്തിക്കുന്ന പമ്പുകള് ജലത്തെ ചെറുകണികകളാക്കി നൂറ് മീറ്ററിലേറെ ദൂരത്തേക്ക് തളിക്കും. കാട്ടു തീ അണയ്ക്കുന്നതിനോടൊപ്പം പടരുന്നത് തടയാനും ഇത് ഉപകരിക്കും. ജലാശയങ്ങളില് നിന്ന് 100 മീറ്റര് ദൂരത്തേക്ക് നേരിട്ട് എത്ര സമയം വേണമെങ്കിലും വെള്ളം പമ്പുചെയ്യാന് സാധിക്കും. കൂടാതെ 450ലിറ്റര് വെള്ളം ശേഖരിക്കാന് ടാങ്കുകളും ഈ വാഹനങ്ങളില് സജ്ജമാക്കിയിട്ടുണ്ട്. 59 ലക്ഷം രൂപയാണ് വാഹനങ്ങള്ക്ക് ചെലവായത്.
മരങ്ങള് വീണ് കാട്ടുപാതകളിലുണ്ടാകുന്ന മാര്ഗതടസ്സം നീക്കാന് സഹായിക്കുന്ന ഉപകരണങ്ങള്, മനുഷ്യ-വന്യജീവി സംഘര്ഷം നിലനില്ക്കുന്ന സ്ഥലങ്ങളില് അവയെ കാട്ടിലേക്ക് തുരത്തുന്നതിന് ഉപയോഗപ്രദമായ സൈറന്, പ്രദേശവാസികള്ക്ക് മുന്നറിയിപ്പ് നല്കുന്നതിനുള്ള സംവിധാനങ്ങള്, കാട്ടിനുള്ളില് ആവശ്യമായ വെളിച്ചം ലഭ്യമാക്കുന്നതിനുള്ള സെര്ച്ച് ലൈറ്റുകള് എന്നിവയും വാഹനത്തിലുണ്ട്.
അത്യുഷ്ണകാലത്ത് കോട്ടൂര്, വയനാട് ആനപുനരധിവാസ കേന്ദ്രങ്ങളില് ആനകളെ തണുപ്പിക്കുന്നതിനും, ആദിവാസി കോളനികളില് കുടിവെള്ളമെത്തിക്കുന്നതിനും വന്യമൃഗങ്ങള്ക്ക് ഉള്ക്കാടുകളില് ജലലഭ്യത ഉറപ്പാക്കുന്നതിനും വാഹനം ഉപയോഗിക്കാനാവും. ആദ്യഘട്ടത്തില് സെന്ട്രല് സര്ക്കിള് തൃശ്ശൂര്, ഈസ്റ്റ് സര്ക്കിള് പാലക്കാട് എന്നിവിടങ്ങളില് വാഹനങ്ങളുടെ സേവനം ലഭ്യമാക്കും.
വാഹനങ്ങളുടെ പ്രവര്ത്തനരീതിയെക്കുറിച്ച് വകുപ്പിലെ 30 വനസംരക്ഷണജീവനക്കാര്ക്ക് പരിശീലനം നല്കി. മുഴുവന് വന സംരക്ഷണ ജീവനക്കാര്ക്കും ഇതിനാവശ്യമായ പരിശീലനം നല്കും. ആദ്യഘട്ട പ്രവര്ത്തനങ്ങളുടെ ഫലം വിലയിരുത്തിയ ശേഷം എല്ലാ ജില്ലകളിലും ഫോറസ്റ്റ് ഫയര് റെസ്പോണ്ടര് വാഹനങ്ങളുടെ സേവനം ലഭ്യമാക്കുന്ന കാര്യം പരിഗണിക്കുമെന്ന് മന്ത്രി പറഞ്ഞു.
മുഖ്യ വനം മേധാവി പി കെ കേശവന്, പി സി സി എഫ്മാരായ ദേവേന്ദ്രകുമാര് വര്മ, ബെന്നിച്ചന് തോമസ്, എ പി സി സി എഫ് മാരായ ഗോപാലകൃഷ്ണന്, ഇ പ്രദീപ് കുമാര്, വി വി ഷാജിമോന് തുടങ്ങി വകുപ്പിലെ മുതിര്ന്ന ഉദ്യോഗസ്ഥരും ജീവനക്കാരും ചടങ്ങില് പങ്കെടുത്തു.
Discussion about this post