തിരുവനന്തപുരം: ലോക്ക് ഡൗണ്‍ മറികടന്ന് വാഹനവുമായി നിരത്തിലിറങ്ങിയാല്‍ കടുത്ത നടപടിയെന്ന് പോലീസ്. ഇത്തരം കാര്യങ്ങള്‍ ശ്രദ്ധയില്‍പ്പെട്ടാല്‍ വാഹനത്തിന്റെ രജിസ്ട്രേഷന്‍ ഉള്‍പ്പെടെ റദ്ദാക്കുമെന്ന് പോലീസ് മുന്നറിയിപ്പ് നല്‍കി. നിയന്ത്രണങ്ങള്‍ വകവെക്കാതെ ജനങ്ങള്‍ നിരത്തിലിറങ്ങുന്ന സാഹചര്യത്തിലാണ് തീരുമാനം.
അനാവശ്യ യാത്രകള്‍ നടത്തുന്നവര്‍ക്കെതിരെ കടുത്ത നടപടി സ്വീകരിക്കുമെന്ന് പോലീസ് നേരത്തെ തന്നെ മുന്നറിയിപ്പ് നല്‍കിയിരുന്നു. ഒരു തവണ മുന്നറിയിപ്പ് നല്‍കി തിരിച്ചയച്ച ശേഷം വീണ്ടും യാത്ര തുടര്‍ന്നാലാണ് രജിസ്ട്രേഷന്‍ റദ്ദാക്കുന്നതുള്‍പ്പെടെയുള്ള നടപടികളിലേക്ക് കടക്കുക. കാഴ്ചകള്‍ കാണാനും മറ്റുമായി ഇന്നും നിരവധിയാളുകളാണ് സംസ്ഥാന സര്‍ക്കാര്‍ നിര്‍ദ്ദേശത്തെ അവഗണിച്ച് നിരത്തിലിറങ്ങിയത്.
സംസ്ഥാനത്ത് ഇതുവരെ നൂറിലേറെ വാഹനങ്ങള്‍ പോലീസ് പിടിച്ചെടുത്തു കഴിഞ്ഞു. കണ്ണൂരില്‍ മാത്രം 69 പേരെ വിവിധയിടങ്ങളില്‍ നിന്നും അറസ്റ്റ് ചെയ്തു. കൊച്ചിയില്‍ 30 പേരെ അറസ്റ്റ് ചെയ്തിട്ടുണ്ട്. നിലവില്‍ പ്രധാനമന്ത്രി പ്രഖ്യാപിച്ച 21 ദിവസത്തെ ലോക്ക് ഡൗണിനു ശേഷം മാത്രമേ പിടികൂടിയ വാഹനങ്ങള്‍ വിട്ടുനല്‍കുകയുള്ളൂ എന്ന് പോലീസ് വ്യക്തമാക്കിയിട്ടുണ്ട്.
Discussion about this post