തിരുവനന്തപുരം: മുഖ്യമന്ത്രിയുടെ അഭ്യര്ത്ഥന മാനിച്ച് എല്ലാ കെ.എസ്.ഇ.ബി ജീവനക്കാരും ഒരു മാസത്തെ വേതനം മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്കണമെന്ന് വൈദ്യുതിമന്ത്രി എം.എം. മണി അഭ്യര്ഥിച്ചു. ലോകത്തെയാകെ ബാധിച്ചിരിക്കുന്ന കോവിഡ്-19 സാഹചര്യത്തില് മാതൃകാപരമായി പ്രവര്ത്തിച്ച കെ.എസ്.ഇ.ബി യിലെ മുഴുവന് ജീവനക്കാര്ക്കും ഹൃദയപൂര്വം അഭിനന്ദനം അറിയിക്കുന്നതായി മന്ത്രി അറിയിച്ചു.
പ്രതിസന്ധിഘട്ടം തരണം ചെയ്യാന് നമുക്കൊരുമിച്ച് ശ്രമിക്കണം. കഴിഞ്ഞ ദിവസം കാസര്ഗോഡ് ആശുപത്രികള് യുദ്ധകാലാടിസ്ഥാനത്തില് സജ്ജീകരിക്കുന്നതിന് വൈദ്യുതി എത്തിക്കാന് സാധിച്ചു. എല്ലാ വിഭാഗം ജനങ്ങള്ക്കും ഈ സന്ദര്ഭത്തില് ആവശ്യമായ സേവനങ്ങളും കരുതലും നല്കാന് മുഖ്യമന്ത്രിയുടെ നേതൃത്വത്തില് എല്ലാ സര്ക്കാര് സംവിധാനങ്ങളും പ്രസ്ഥാനങ്ങളും സംഘടനകളും നിരന്തരം പ്രയത്നിക്കുകയാണ്.
ഈ സന്ദര്ഭത്തില് അവശ്യ സേവനമായ വൈദ്യുതി എല്ലായിടവും മുടക്കം കൂടാതെ എത്തിക്കേണ്ടതുണ്ട്. പ്രത്യേകിച്ച് ആശുപത്രികള്, നിരീക്ഷണത്തിലുള്ളവരുടെ വീടുകള്, കമ്യൂണിറ്റി കിച്ചണുകള്, ഐസൊലേഷന് കേന്ദ്രങ്ങള്, തുടങ്ങിയവ. ഇതിന് ആവശ്യമായ പ്രവര്ത്തനങ്ങള് തുടര്ച്ചയായി ചെയ്യുന്നതിന് ജീവനക്കാരെ നിയോഗിക്കുകയും എല്ലായിപ്പോഴും എല്ലായിടവും പകരക്കാരെ കരുതുകയും വേണം.
ജീവനക്കാരുടെ സുരക്ഷിതത്വം ഉറപ്പാക്കി ഇക്കാര്യങ്ങളില് സര്ക്കാരിന്റെ നിര്ദ്ദേശങ്ങള് പൂര്ണ്ണമായും പാലിച്ചാകണം പ്രവര്ത്തനങ്ങള്. ഇത്തരത്തില് വൈദ്യുതി വിതരണം സംസ്ഥാനമാകെ തടസമില്ലാതെ നടത്തുന്നതിന് എല്ലാ ജീവനക്കാരുടെയും സഹകരണമുണ്ടാകണമെന്നും മന്ത്രി അഭ്യര്ഥിച്ചു.
Discussion about this post