തിരുവനന്തപുരം: സംസ്ഥാന വ്യാപകമായി ലീഗല് മെട്രോളജി വകുപ്പ് കഴിഞ്ഞ ഒരാഴ്ചക്കാലം നടത്തിയ പരിശോധനയില് നിയമലംഘനം നടത്തിയവരില് നിന്നും ഏഴ് ലക്ഷത്തി അറുപതിനായിരം രൂപ പിഴ ഈടാക്കി. 2217 പരിശോധനകളിലൂടെ 165 കേസുകളാണ് രജിസ്റ്റര് ചെയ്തത്.
മെഡിക്കല് സ്റ്റോറുകള്, പ്രൊവിഷന് സ്റ്റോറുകള്, മാര്ക്കറ്റുകള് തുടങ്ങിയവ കേന്ദ്രീകരിച്ചായിരുന്നു പരിശോധന. സാനിറ്റൈസര്, ഫെയ്സ് മാസ്ക്, കുപ്പി വെള്ളം, പായ്ക്ക് ചെയ്ത ഉല്പ്പന്നങ്ങള് തുടങ്ങിയവയ്ക്ക് അമിതവില ഈടാക്കിയതിനും മറ്റ് നിയമ ലംഘനങ്ങള്ക്കുമാണ് കേസെടുത്തത്. വിലവിവര പട്ടിക പ്രദര്ശിപ്പിക്കുന്നില്ലെന്നും പഴം, പച്ചക്കറി തുടങ്ങിയവയ്ക്ക് അമിത വില ഈടാക്കുന്നതായുമുള്ള പരാതികള് ലീഗല് മെട്രോളജി വകുപ്പിന്റെ പരിധിയില് വരുന്നവയല്ല. ഭക്ഷ്യ പൊതുവിതരണ വകുപ്പിനാണ് ഇത്തരം പരാതികളില് നടപടി സ്വീകരിക്കാന് കഴിയുന്നത്.
അളവിലോ തൂക്കത്തിലോ കുറച്ച് വില്പ്പന നടത്തുക, മുദ്ര ചെയ്യാത്ത അളവ് തൂക്ക ഉപകരണങ്ങള് ഉപയോഗിച്ച് വ്യാപാരം നടത്തുക, നിയമാനുസൃതമുള്ള പ്രഖ്യാപനങ്ങള് രേഖപ്പെടുത്താത്ത പായ്ക്കറ്റുകള് വില്പ്പന നടത്തുക തുടങ്ങിയ നിയ ലംഘനങ്ങള്ക്കെതിരെയാണ് പ്രധാനമായും ലീഗല് മെട്രോളജി നിയമവും ചട്ടങ്ങളും പ്രകാരം കേസ് രജിസ്റ്റര് ചെയ്യാനാവുക. രജിസ്റ്റര് ചെയ്ത എല്ലാ കേസുകളിലും കടയുടമകള് പിഴ അടച്ചിട്ടില്ല. യഥാസമയം പിഴ അടയ്ക്കാത്തവര്ക്കെതിരെ പ്രോസിക്യൂഷന് നടപടികള് സ്വീകരിക്കുമെന്ന് ലീഗല് മെട്രോളജി കണ്ട്രോളര് അറിയിച്ചു.
ഉപഭോക്താക്കള്ക്ക് കണ്ട്രോള് റൂം നമ്പരുകളിലും 1800 425 4835 എന്ന ടോള് ഫീ നമ്പരിലും സുതാര്യം എന്ന മൊബൈല് ആപ്ലിക്കേഷനിലും lmd.kerala.gov.in എന്ന വെബ് സൈറ്റിലും പരാതികള് അറിയിക്കാം.
Discussion about this post