കോഴിക്കോട്: സംഭരിക്കുന്നതിന്റെ പകുതി പാല് പോലും വിപണനം ചെയ്യാനാകാത്തതിനെ തുടര്ന്ന് മലബാറില്, മില്മ പ്രതിസന്ധിയില്. ഇന്ന് മുതല് പാല് സംഭരിക്കില്ല. നാളെ മുതല് ക്ഷീരോല്പ്പാദന സംഘങ്ങള് കുറച്ചുമാത്രം പാല് സംഭരിച്ചാല് മതിയെന്ന് മേഖല യൂണിയന് അറിയിച്ചതോടെ കോഴിക്കോട്ടെ ക്ഷീരകര്ഷകര് പ്രതിസന്ധിയിലാണ്.
നിലവില് മലബാര് മേഖലയില് ഓരോ ദിവസവും മില്മ 6 ലക്ഷം ലിറ്റര് പാലാണ് സംഭരിക്കുന്നത്. എന്നാല് ലോക്ഡൗണ് വന്നതോടെ വിപണനം 3 ലക്ഷം ലിറ്ററായി കുറഞ്ഞു. പാല് വീടുകളിലും ഫ്ളാറ്റുകളിലുമെത്തിച്ചും ലോങ് ലൈഫ് പാല് വിതരണം നടത്തിയും പ്രതിസന്ധി പരിഹരിക്കാന് ശ്രമിച്ചെങ്കിലും നടന്നിട്ടില്ല. ഇതോടെ ക്ഷീരകര്ഷകരും പ്രതിസന്ധിയിലായി. കാലിത്തീറ്റയും വൈക്കോലും കിട്ടാതെ കഷ്ടപ്പെട്ട ക്ഷീര കര്ഷകര്ക്കു പാല് സംഭരണവും കൂടി നിലച്ചതോടെ ദുരിതം ഇരട്ടിയായി. മിക്കയിടത്തും ക്ഷീരോല്പാദക സഹകരണ സംഘം വഴി നല്കിയിരുന്ന കാലിത്തീറ്റയും കഴിഞ്ഞു. കൂടാതെ വാഹനഗതാഗതവും നിലച്ചതോടെ വൈക്കോലും കിട്ടാതായി. ഇതിനിടെയാണ് പാല് നല്കേണ്ടതില്ലെന്ന് സഹകരണ സംഘങ്ങളില്നിന്നു കര്ഷകര്ക്ക് അറിയിപ്പ് ലഭിച്ചത്. ഇതോടെ നിലവില് ശേഖരിക്കുന്ന പാല് ഒഴുക്കിക്കളയുകയേ മാര്ഗമുള്ളൂ എന്ന് ഇവര് പറയുന്നു.
പാല് സംഭരിക്കാതെ വരികയും നാളെ മുതല് സംഭരണം പകുതിയാക്കുകയും ചെയ്യുന്നതോടെ കര്ഷര്ക്ക് വലിയ തിരിച്ചടിയാണുണ്ടാകുക. എത്രയും പെട്ടെന്ന് ഇതിനൊരു പരിഹാരം സര്ക്കാരും, മില്മയും കൈക്കൊള്ളണം എന്നാണ് ഇവരുടെ ആവശ്യം.
