തിരുവനന്തപുരം : കൊറോണ വൈറസ് വ്യാപനത്തിന്റെ പശ്ചാത്തലത്തില് സര്ക്കാരും പോലീസും നടത്തുന്ന പ്രതിരോധ പ്രവര്ത്തനങ്ങളുമായി ബന്ധപ്പെട്ട് വ്യാജ സന്ദേശങ്ങള് പ്രചരിപ്പിക്കുന്നതിനെതിരെ മുന്നറിയിപ്പുമായി സംസ്ഥാന പോലീസ് മേധാവി ലോക്നാഥ് ബെഹ്റ. സാമൂഹ്യ മാദ്ധ്യമങ്ങള് വഴി വ്യാജവാര്ത്തകളും സന്ദേശങ്ങളും പ്രചരിപ്പിക്കുന്നവര്ക്കെതിരെ കര്ശന നടപടി സ്വീകരിക്കുമെന്ന് ലോക്നാഥ് ബെഹ്റ അറിയിച്ചു. കൊറോണ വൈറസ് ബാധയുമായി ബന്ധപ്പെട്ട് അതിശയോക്തിപരമായും തെറ്റായും ഉള്ള വിവരങ്ങള് ഉള്ക്കൊള്ളിച്ചു സാമൂഹ്യ മാധ്യമങ്ങളില് ശബ്ദ സന്ദേശങ്ങള് പ്രചരിക്കുന്നതായി ശ്രദ്ധയില്പെട്ടിട്ടുണ്ട്. ഈ സാഹചര്യത്തിലാണ് സംസ്ഥാന പോലീസ് മേധാവിയുടെ മുന്നറിയിപ്പ്.
കൊറോണയുമായി ബന്ധപ്പെട്ട വിവരങ്ങള് നല്കാനെന്ന പേരില് ചിലര് തെറ്റായ വിവരങ്ങള് ഉള്പ്പെടുത്തി മൊബൈല് ആപ്ലിക്കേഷനുകള് തയ്യാറാക്കി വ്യാപകമായി പ്രചരിപ്പിക്കുന്നതായി ശ്രദ്ധയില്പ്പെട്ടിട്ടുണ്ട്. ഇത്തരം നടപടികള് ക്രിമിനല് കുറ്റമാണ്. ഇത്തരക്കാര്ക്കെതിരെ ശക്തമായ നിയമ നടപടി സ്വീകരിക്കുമെന്നും ബെഹ്റ വ്യക്തമാക്കി.
നേരത്തെ കൊറോണ വൈറസ് ബാധയുടെ ചികിത്സയും, പ്രതിരോധവുമായി ബന്ധപ്പെട്ട് വ്യാജവാര്ത്തകള് പ്രചരിക്കുന്നതായി മുഖ്യമന്ത്രി വാര്ത്താസമ്മേളനത്തില് പറഞ്ഞിരുന്നു. ഇതിന് പിന്നാലെയാണ് സംസ്ഥാന പോലീസ് മേധാവി മുന്നറിയിപ്പ് നല്കിയത്.
Discussion about this post