ന്യൂഡല്‍ഹി: ഡല്‍ഹിയില്‍ നിന്ന് കൊങ്കണ്‍ വഴി തിരുവനന്തപുരത്തേക്ക് ബുധനാഴ്ച സര്‍വീസ് ആരംഭിക്കുന്ന തീവണ്ടിക്ക് കോഴിക്കോടും എറണാകുളം ജംഗ്ഷനിലും മാത്രമെ സ്‌റ്റോപ്പ് ഉണ്ടായിരിക്കുകയുള്ളുവെന്ന് റെയില്‍വേയുടെ അറിയിപ്പില്‍ പറയുന്നു.
ആദ്യഘട്ടത്തില്‍ ന്യൂഡല്‍ഹിയില്‍ നിന്ന് വിവിധ സംസ്ഥാനങ്ങളിലെ 15 കേന്ദ്രങ്ങളിലേക്കും തിരിച്ചും ആകെ 30 സര്‍വീസ് ആണ് ഉണ്ടാവുക. ബുധനാഴ്ച ഡല്‍ഹിയില്‍നിന്ന് പുറപ്പെടുന്ന കേരളത്തിലേക്കുള്ള ആദ്യ ട്രെയിന്‍ വെള്ളിയാഴ്ച തിരുവനന്തപുരത്ത് എത്തും. ആഴ്ചയില്‍ മൂന്ന് രാജധാനി സര്‍വീസുകളാണ് ആദ്യ ഘട്ടത്തില്‍ ഉണ്ടാവുക.
ഇന്ന് വൈകിട്ട് നാല് മണി മുതല്‍ ഐ.ആര്‍.സി.ടി.സി വെബ്‌സൈറ്റ് വഴി ഓണ്‍ലൈനായി ടിക്കറ്റ് ബുക്കിംഗ് ആരംഭിച്ചു. റെയില്‍വേ കൗണ്ടറുകള്‍ വഴി ബുക്കിങ് ഉണ്ടായിരിക്കില്ല. പ്ലാറ്റ്‌ഫോം ടിക്കറ്റുകളോ ആര്‍.എ.സി ടിക്കറ്റുകളോ ഉണ്ടായിരിക്കില്ല.
കര്‍ശന പരിശോധനയ്ക്കു ശേഷമാകും യാത്രക്കാരെ തീവണ്ടിയില്‍ പ്രവേശിപ്പിക്കുക. മുഖാവരണം നിര്‍ബന്ധമായും ധരിക്കണം. യാത്രയ്ക്ക് മുന്‍പായി ശരീരോഷ്മാവ് പരിശോധിക്കും കോവിഡ് ലക്ഷണങ്ങള്‍ ഇല്ലാത്തവര്‍ക്ക് മാത്രമാണ് യാത്രാനുമതി.
Discussion about this post