തിരുവനന്തപുരം: പരാതിക്കാരോട് അപമര്യാദയായി പെരുമാറിയ പോലീസുകാരന് സസ്പെന്ഷന്. നെയ്യാര്ഡാം പോലീസ് സ്റ്റേഷനിലെ ഗ്രേഡ് എഎസ്ഐ ഗോപകുമാറിനെയാണ് അന്വേഷണ വിധേയമായി സസ്പെന്ഡ് ചെയ്തത്. എഎസ്ഐയുടെ പ്രവര്ത്തനം പോലീസ് സേനയ്ക്കു ചേരാത്തതാണെന്നും സേനയെ അപകീര്ത്തിപ്പെടുത്തിയതായും ഡിഐജിയുടെ അന്വേഷണ റിപ്പോര്ട്ടില് പറയുന്നു.
ഗോപകുമാറിനെതിരെ വകുപ്പുതല നടപടി സ്വീകരിക്കണമെന്ന് ഡിഐജി സഞ്ജയ് കുമാര് ഗുരുദീന് റിപ്പോര്ട്ട് നല്കിയതിനു പിന്നാലെയാണ് സസ്പെന്ഷന്. ഗോപകുമാറിനെ നേരത്തെ ഇടുക്കിയിലേക്ക് സ്ഥലംമാറ്റിയിരുന്നു.
പോലീസ് സ്റ്റേഷനില് പരാതി നല്കാനെത്തിയ അച്ഛനോടും ഒപ്പമുണ്ടായിരുന്ന മകളോടുമാണ് ഗോപകുമാര് അപമര്യാദയായി പെരുമാറിയത്. സംഭവത്തിന്റെ ദൃശ്യങ്ങള് സമൂഹമാധ്യമങ്ങളില് വൈറലായതോടെ വിവാദമായത്. പരാതിക്കാരനൊപ്പമുണ്ടായിരുന്ന ആളാണ് കൈവശം ഉണ്ടായിരുന്ന ഫോണില് സംഭവം റെക്കോര്ഡ് ചെയ്തത്.
സംഭവത്തില് അന്വേഷണം നടത്തിയ ഡിഐജി സഞ്ജയ് കുമാര് ഗുരുദീന് ഗോപകുമാര് കുറ്റക്കാരനാണെന്ന് കണ്ടെത്തി. പരാതിക്കാരന് പ്രകോപിപ്പിച്ചു എന്ന എഎസ്ഐയുടെ വിശദീകരണം നിലനില്ക്കില്ല. പരാതി അന്വേഷിച്ചിരുന്നത് എഎസ്ഐ ഗോപകുമാറായിരുന്നില്ല.
മറ്റൊരു കേസിന്റെ അന്വേഷണത്തിന്റെ ഭാഗമായാണ് ഗോപകുമാര് സ്റ്റേഷനിലെത്തിയത്. അതിനിടെ പ്രകോപിതനായി മോശംവാക്കുകള് ഉപയോഗിച്ചത് ന്യായീകരിക്കാനാകില്ല. ഡ്യൂട്ടിയിലിരിക്കേ മഫ്തി വേഷത്തില് സ്റ്റേഷനിലേക്കു വന്നതു തെറ്റാണ്. സിവില് ഡ്രസില് പോകേണ്ട ഡ്യൂട്ടിയിലായിരുന്നില്ല ഗോപകുമാറെന്നും റിപ്പോര്ട്ടില് പറയുന്നു.
Discussion about this post