തിരുവനന്തപുരം: ശ്രീരാമദാസ മിഷന്‍ യൂണിവേഴ്‌സല്‍ സൊസൈറ്റിയുടെ ആഭിമുഖ്യത്തില്‍ നടക്കുന്ന ശ്രീരാമനവമി രഥയാത്രയ്ക്കുള്ള ശ്രീരാമരഥം ചേങ്കോട്ടുകോണം ശ്രീരാമദാസ ആശ്രമത്തില്‍ നിന്നും ഇന്ന് രാവിലെ(ഏപ്രില്‍ 5) 8:15ന് തിരുവനന്തപുരം പഴവങ്ങാടി ശ്രീമഹാഗണപതി ക്ഷേത്രത്തിലെത്തി നാളികേരമുടച്ച് കൊല്ലൂര്‍ ശ്രീമൂകാംബികാ ദേവീക്ഷേത്രത്തിലേക്ക് യാത്ര തിരിച്ചു. 
പഴവങ്ങാടി ക്ഷേത്രം മാനേജര്‍ വി.ഉണ്ണിക്കൃഷ്ണന്‍, അസിസ്റ്റന്റ് മാനേജര്‍ കൃഷ്ണന്‍ നായര്‍ തുടങ്ങിയവരുടെ സാന്നിദ്ധ്യത്തില്‍ മേല്‍ശാന്തി ശങ്കരന്‍ പോറ്റി ആരതി ഉഴിഞ്ഞാണ് രഥത്തെ യാത്രയാക്കിയത്. എസ്.ആര്‍.ഡി.എം.യു.എസ് ജനറല്‍ സെക്രട്ടറി ഉണ്ണിക്കൃഷ്ണന്‍ മംഗലശ്ശേരി, ശ്രീരാമനവമി രഥയാത്ര കണ്‍വീനര്‍ സ്വാമി സത്യാനന്ദ തീര്‍ത്ഥപാദര്‍, രഥയാത്ര തിരുവനന്തപുരം ജില്ലാകോ-ഓര്‍ഡിനേറ്റര്‍ ഡി.ഭഗവല്‍ദാസ്, ലാല്‍ജിത്.ടി.കെ, പി.അജിത് കുമാര്‍, ആശാ നായര്‍ തുടങ്ങിയവര്‍ സന്നിഹിതരായിരുന്നു.
ഏപ്രില്‍ 8ന് കൊല്ലൂര്‍ ശ്രീമൂകാംബികാ ദേവീക്ഷേത്ര സന്നിധിയില്‍ ശ്രീരാമദാസ മിഷന്‍ അദ്ധ്യക്ഷന്‍ സ്വാമി ബ്രഹ്മപാദാനന്ദ സരസ്വതി തൃപ്പാദങ്ങള്‍ ഭദ്രദീപ പ്രതിഷ്ഠ നടത്തി ശ്രീരാമനവമി രഥയാത്ര ആരംഭിക്കും. സീതാ-രാമ-ആഞ്ജനേയ വിഗ്രഹങ്ങളും ശ്രീരാമപാദുകവും ബ്രഹ്മശ്രീ നീലകണ്ഠഗുരുപാദരുടെയും ജഗദ്ഗുരു സ്വാമി സത്യാനന്ദ സരസ്വതി തൃപ്പാദങ്ങളുടെയും ഛായാചിത്രങ്ങള്‍ എന്നിവ നിത്യപൂജയ്ക്കായി ശ്രീരാമരഥത്തില്‍ ഉണ്ടാകും. പത്തോളം രാമസേവകര്‍ ശ്രീരാമരഥത്തെ അനുഗമിക്കും. കോവിഡ് സുരക്ഷാമാനദണ്ഡങ്ങള്‍ പൂര്‍ണമായും പാലിച്ചുകൊണ്ടാണ് രഥയാത്ര നടക്കുന്നത്. ശ്രീരാമനവമി ദിനമായ ഏപ്രില്‍ 21ന് ശ്രീരാമനവമി രഥയാത്ര സമാപിക്കും.
Discussion about this post