ന്യൂഡല്ഹി: രണ്ടാംഘട്ട കൊവിഡ് വ്യാപനം രൂക്ഷമായി രാജ്യത്തെ ബാധിച്ചതിന്റെ വെളിച്ചത്തില് മൂന്നാംഘട്ട വ്യാപനത്തെ ശക്തമായി പ്രതിരോധിക്കാന് പാക്കേജുമായി കേന്ദ്ര സര്ക്കാര്. 20,000 കോടിയുടെ കൊവിഡ് പ്രതിരോധത്തിനുളള അടിയന്തര തയ്യാറെടുപ്പ് (ഇസിആര്പി-2) പാക്കേജിനായി 20,000 കോടി രൂപയാണ് കേന്ദ്ര സര്ക്കാര് നീക്കിവയ്ക്കാന് പോകുന്നത്. ക്യാബിനറ്റ് അംഗീകാരം ലഭിച്ചാലുടന് ഫണ്ട് അനുവദിച്ച് തുടങ്ങും. കൊവിഡിന്റെ മൂന്നാം തരംഗത്തെ മുന്കൂട്ടി കണ്ട് കരുതിയിരിക്കാനും പ്രതിരോധിക്കാനുമാണ് ഈ ഫണ്ടെന്ന് ഒരു മുതിര്ന്ന കേന്ദ്ര സര്ക്കാര് പ്രതിനിധി ‘ദി ഇക്കണോമിക്സ് ടൈംസി’നെ അറിയിച്ചു.
ആരോഗ്യ, ധനകാര്യ മന്ത്രാലയ അധികൃതര് പാക്കേജിന്റെ അവസാനവട്ട മിനുക്കുപണിയിലാണ്. മന്ത്രിസഭാ അംഗീകാരം ലഭിച്ചാലുടന് പാക്കേജിനെ കുറിച്ച് അറിയാനാകും. കൊവിഡ് ചികിത്സാ സൗകര്യങ്ങള് വര്ദ്ധിപ്പിക്കാനാണ് പാക്കേജ് കൊണ്ട് ഉദ്ദേശിക്കുന്നത്. കേന്ദ്ര, സംസ്ഥാന സര്ക്കാരുകള്ക്ക് കീഴില് വരുന്നയിടങ്ങളിലെ ചികിത്സാ സൗകര്യങ്ങളുടെ വികസനം, ആശുപത്രി കിടക്കകളുടെ എണ്ണം വര്ദ്ധിപ്പിക്കുക, മെഡിക്കല് സൗകര്യങ്ങളും മരുന്നുകളും ആവശ്യത്തിന് എത്തിക്കുക, കൂടുതല് ലബോറട്ടറികളും ടെസ്റ്റിംഗ് സൗകര്യങ്ങളും ഏര്പ്പെടുത്തുക എന്നിവയൊക്കെയാണ് പാക്കേജ് കൊണ്ട് ഉദ്ദേശിക്കുന്നത്.
രാജ്യത്ത് മൂന്നാംഘട്ട വ്യാപനം തീര്ച്ചയായും ഉണ്ടാകുമെന്നും ഡെല്റ്റാ പ്ളസ് കൊവിഡ് വകഭേദം കണ്ടെത്തിയതുമാണ് ശക്തമായ പ്രതിരോധ മാര്ഗത്തിലേക്ക് കേന്ദ്ര സര്ക്കാരിനെ ചിന്തിപ്പിച്ചത്. മദ്ധ്യപ്രദേശിലും മഹാരാഷ്ട്രയിലും കേരളത്തിലുമാണ് ഡെല്റ്റാ പ്ളസ് വകഭേദം കണ്ടെത്തിയത്. ഇതില് മദ്ധ്യപ്രദേശില് ഒരു സ്ത്രീ മരണമടഞ്ഞത് ഡെല്റ്റാ പ്ളസ് വകഭേദം മൂലമാണെന്ന് കണ്ടെത്തുകയും ചെയ്തു.
ഡെല്റ്റാ പ്ളസ് വകഭേദം കണ്ടെത്തിയ സംസ്ഥാനങ്ങളില് ടെസ്റ്റിംഗും വാക്സിനേഷനും കണ്ടെയിന്മെന്റ് നടപടികള് ശക്തിപ്പെടുത്താന് കേന്ദ്രം സംസ്ഥാന സര്ക്കാരുകളോട് ആവശ്യപ്പെട്ടു. ജാനോം സീക്വന്സിംഗ് വഴി രോഗ വകഭേദങ്ങളെ തിരിച്ചറിയാനും രോഗത്തെ കുറിച്ചുളള ഗവേഷണത്തിനും ശക്തിപകരുന്നതാകും പുതിയ പാക്കേജ്.
Discussion about this post