തിരുവനന്തപുരം: വെങ്ങാനൂര് ചാവടിനട ശ്രീ പൗര്ണ്ണമിക്കാവ് ക്ഷേത്രത്തില് മെയ് 6ന് ആരംഭിച്ച് 16 വരെ നടക്കുന്ന മഹാകാളികാ യാഗത്തില് പങ്കെടുക്കുന്നതിനാണ് അഘോരി സന്യാസിമാര് കേരളത്തിലെത്തുന്നു. ഭാരതത്തിന്റെ യാജ്ഞിക ചരിത്രത്തില് ആദ്യമായി നിരവധി ശക്തി പീഠങ്ങള് ഒന്നിച്ച് ചേര്ന്ന് നടത്തുന്ന മഹാകാളികായാഗം പൗര്ണ്ണമിക്കാവ് ബാല ത്രിപുരസുന്ദരി ക്ഷേത്രസന്നിധിയില് നടക്കുന്നത്. മഹാമാരികളില് വലയുന്ന ലോകത്തിന്റെ നന്മയ്ക്ക് വേണ്ടിയാണ് മഹാകാളികാ യാഗം നടത്തുന്നത്.
അഘോരി സന്യാസിമാര്ക്കിടയില് മഹാ കാല് ബാബ എന്നറിയപ്പെടുന്ന കൈലാസപുരി സ്വാമിയും മഹാകാളികായാഗത്തില് പങ്കെടുക്കാന് എത്തിച്ചേരും. ഹിമാലയ സാനുക്കളില് തപസ്സനുഷ്ഠിക്കുന്ന 87 വയസ്സുള്ള കൈലാസപുരി സ്വാമിജി യാഗശാലയിലെത്തുന്നുവെന്നത് ഏറെ പുണ്യമായി ഭക്തജനങ്ങള് കണക്കാക്കുന്നു.
കൊല്ലൂര് ശ്രീമൂകാംബിക ക്ഷേത്രത്തിലെ മുഖ്യപുരോഹിതന് ഡോ.രാമചന്ദ്ര അഡിഗയാണ് മഹാകാളികാ യാഗത്തിന് നേതൃത്വം നല്കുന്നത്. ഗുജറാത്തിലെ സോമനാഥ ക്ഷേത്രം, കാശി വിശ്വനാഥക്ഷേത്രം, ആന്ധ്രപ്രദേശിലെ ശ്രീകാളഹസ്തി ക്ഷേത്രം, മധ്യപ്രദേശിലെ ഉജ്ജൈനി ക്ഷേത്രം, പഞ്ചാബിലെ മാതാ കാളി ശക്തി പീഠ് ക്ഷേത്രം, അസാമിലെ കാമാഖ്യ ക്ഷേത്രം, പശ്ചിമ ബംഗാളിലെ താരാ പീഠ് കാളി ക്ഷേത്രം, ഒറീസ്സയിലെ കാളി വിമല ദേവി ക്ഷേത്രം, ബംഗാളിലെ കാളികാ ക്ഷേത്രം, ഉത്തര് പ്രദേശിലെ മാ വിന്ധ്യാ വാസിനി ക്ഷേത്രം, ഹിമാചല് പ്രദേശിലെ മാ ജ്വാലാമുഖീ ശക്തി പീഠ് ക്ഷേത്രം, മധ്യപ്രദേശിലെ മഹാ കാല ഭൈരവ ക്ഷേത്രം എന്നിവിടങ്ങളിലെ പുരോഹിതന്മാരും നിരവധി ആശ്രമങ്ങളില് നിന്നുള്ള സന്യാസി ശ്രേഷ്ഠന്മാരും മഹാകാളികായാഗത്തില് പങ്കെടുക്കുന്നുണ്ട്.
Discussion about this post